विनोद पवार (जळगाव प्रतिनिधी) : बोदवड तालुक्यातील शेळवड येथे हरभरा काढणीदरम्यान एक गंभीर अपघात घडला. गावातील योगेश सिद्धार्थ बोदडे हे स्वतःच्या शेतात काढणीचे काम पाहत असताना चुकून काढणी यंत्राच्या हेडमध्ये अडकले. या घटनेने परिसरात एकच खळबळ उडाली.
घटनेची माहिती मिळताच शेतातील इतर मजूर व नागरिकांनी तत्काळ धाव घेतली आणि प्रसंगावधान राखत योगेश बोदडे यांना सुरक्षित बाहेर काढले. सुदैवाने मोठी जीवितहानी टळली.
सध्या हरभरा काढणीचा हंगाम सुरू असून अनेक ठिकाणी घाईगडबडीत काम सुरू आहे. यामुळे अशा अपघातांचा धोका वाढत असल्याचे तज्ञांनी सांगितले आहे. काढणी यंत्रे हाताळताना योग्य अंतर राखणे, यंत्र सुरू असताना जवळ न जाणे आणि सुरक्षा नियमांचे पालन करणे अत्यंत आवश्यक आहे.
या घटनेच्या पार्श्वभूमीवर शेतकरी, तसेच ट्रॅक्टर व हार्वेस्टर चालकांनी अधिक सतर्क राहून काम करण्याचे आवाहन करण्यात येत आहे. “थोडा वेळ जास्त लागला तरी चालेल, पण सुरक्षितता सर्वांत महत्त्वाची,” असा संदेश या घटनेतून देण्यात आला आहे.
