विनोद सुधाकर पवार ( जळगाव प्रतिनिधी ) : बेटावद बु. येथील प्राथमिक विद्या मंदिर, जि.प. मराठी शाळेत आगामी शैक्षणिक वर्षासाठी उत्साहवर्धक चित्र पाहायला मिळत आहे. जून-जुलैपासून सुरू होणाऱ्या नवीन सत्राच्या पार्श्वभूमीवर इयत्ता पहिलीसाठी तब्बल ३७ विद्यार्थ्यांचे प्रवेश निश्चित झाले आहेत. विशेष म्हणजे शैक्षणिक वर्ष सुरू होण्यापूर्वीच एवढ्या मोठ्या प्रमाणावर प्रवेश झाल्याने शाळेची गुणवत्तापूर्ण व विश्वासार्ह शैक्षणिक संस्था म्हणून ओळख अधिक दृढ झाली आहे.
शाळेत केवळ गुणवत्तापूर्ण शिक्षणच नव्हे, तर विद्यार्थ्यांच्या सर्वांगीण विकासासाठी विविध उपक्रम सातत्याने राबविले जातात. मुख्याध्यापक, शिक्षक व शिक्षिका यांच्या एकत्रित व समर्पित प्रयत्नांमुळे शाळेने शिक्षण क्षेत्रात आपला वेगळा ठसा उमटवला आहे. याच कार्यपद्धतीवर विश्वास ठेवून पालकांनी आपल्या पाल्यांचे प्रवेश करून शाळेला मोलाचे सहकार्य केले आहे.
नवीन प्रवेश घेतलेल्या विद्यार्थ्यांचे स्वागत करताना श्री. प्रकाश सुधाकर गाढे यांनी वह्या, पेन्सिल तसेच इतर शैक्षणिक साहित्याचे वाटप करून विद्यार्थ्यांना प्रोत्साहन दिले. तसेच मुख्याध्यापक घुले सर व शिक्षिका हर्षा ताई यांच्या हस्ते विद्यार्थ्यांना अंकलिपी देण्यात आली. या उपक्रमाबद्दल सर्व दात्यांचे विशेष आभार मानण्यात आले.
दरम्यान, गावातून अजूनही मोठ्या संख्येने प्रवेश अपेक्षित असून पालकांनी आपल्या मुलांचा प्रवेश मराठी शाळेतच करावा, असे आवाहन करण्यात आले. गावकरी, माजी विद्यार्थी आणि शाळा व्यवस्थापन समिती यांच्या सहकार्याने “मराठी शाळा वाचली पाहिजे” हा संदेश जनतेपर्यंत पोहोचविण्यात आला.
मराठी शाळेतील विद्यार्थी उच्च शिक्षण घेऊन शाळा आणि गावाचे नाव उज्ज्वल करतील, असा विश्वास यावेळी व्यक्त करण्यात आला. कार्यक्रमाच्या शेवटी उपस्थित मान्यवरांचे आभार शाळा व्यवस्थापन समितीच्या वतीने मानण्यात आले.
