जळगाव(प्रतिनिधी विनोद पवार) : जळगाव एमआयडीसी पोलीस ठाण्याच्या हद्दीत घडलेल्या घरफोडी प्रकरणाचा छडा लावत पोलिसांनी आंतरराज्य गुन्हेगार टोळीचा पर्दाफाश केला आहे. या कारवाईत पाच आरोपींना अटक करण्यात आली असून त्यांच्या ताब्यातून सुमारे ११ लाख ५ हजार ४०० रुपयांचा मुद्देमाल जप्त करण्यात आला आहे.
मिळालेल्या माहितीनुसार, तारा बिझनेस पार्क परिसरात २२ एप्रिल २०२६ रोजी चोरीची घटना उघडकीस आली होती. घरमालक कुटुंबासह बाहेरगावी गेले असताना अज्ञात चोरट्यांनी घराचे कुलूप तोडून सोन्या-चांदीचे दागिने तसेच रोख रक्कम असा सुमारे १२ लाख २३ हजार रुपयांचा ऐवज लंपास केला होता. याप्रकरणी एमआयडीसी पोलीस ठाण्यात गुन्हा दाखल करण्यात आला होता.
गुन्ह्याचा तपास करताना स्थानिक गुन्हे शोध पथकाने तांत्रिक विश्लेषण, सीसीटीव्ही फुटेज आणि गुप्त माहितीच्या आधारे आरोपींचा माग काढला. तपासादरम्यान ही टोळी मध्यप्रदेश राज्यातील असल्याचे समोर आले. पोलिसांनी सापळा रचून संशयितांना ताब्यात घेत अटक केली.
अटक करण्यात आलेल्या आरोपींमध्ये निलेश उर्फ भुरा माहोरिया, ताराचंद सोलंकी, राकेश सोलंकी, गोविंद उर्फ छोटू आहेर आणि दिलीप मंगा माहोरिया यांचा समावेश आहे. आरोपींकडून ३१ ग्रॅम सोन्याचे दागिने, १२ ग्रॅम चांदीचे दागिने आणि ५ लाख ७८ हजार रुपये रोख असा मोठा मुद्देमाल जप्त करण्यात आला आहे.
या कारवाईमुळे चोरीस गेलेल्या मुद्देमालाचा मोठा हिस्सा परत मिळवण्यात पोलिसांना यश आले आहे. जळगाव जिल्हा पोलीस अधीक्षक श्रीकांत धिवरे, अपर पोलीस अधीक्षक संदीप गावीत यांच्या मार्गदर्शनाखाली एमआयडीसी पोलीस ठाण्याचे निरीक्षक बबन आकोडे यांच्या पथकाने ही उल्लेखनीय कामगिरी केली.
या कारवाईत पोउनि राहुल तारडे, पोहेकॉ चंद्रकांत धनके, प्रमोद लांडबंजारी, किरण चौधरी, गिरीश पाटील, पोना मोतीलाल बोरेसे, विशाल कोळी, रामकांत साबळे, शशिकांत मराठे, नितीन ठाकूर आणि राहुल येथे यांनी विशेष परिश्रम घेतले.
या यशस्वी कारवाईबद्दल पोलीस पथकाचे सर्व स्तरातून अभिनंदन करण्यात येत आहे.
