गेवराई (प्रतिनिधी विष्णू गायकवाड) : बीड जिल्ह्यातील आष्टी तालुक्यातील मुर्शिदपूर येथील सीमा बेगम जावेद सय्यद यांनी स्वतःच्या जिद्द, मेहनत आणि आत्मविश्वासाच्या जोरावर एकाच वेळी तब्बल १० विविध व्यवसाय यशस्वीपणे उभे करत महिलांसाठी प्रेरणादायी आदर्श निर्माण केला आहे. घरातून सुरू केलेल्या छोट्या व्यवसायाला त्यांनी आज मोठ्या यशात रूपांतरित केले असून, त्यांच्या कार्याची परिसरात मोठी चर्चा होत आहे.
सीमा सय्यद या “सीमा लेडीज टेलर्स” या नावाने शिवणकला व्यवसाय आणि प्रशिक्षण वर्ग चालवतात. त्यांनी आतापर्यंत १०० हून अधिक महिलांना शिवणकामाचे प्रशिक्षण देत आत्मनिर्भर बनवले आहे. त्यांच्या मार्गदर्शनाखाली प्रशिक्षण घेतलेल्या अनेक महिला आज स्वतःचा व्यवसाय सुरू करून कुटुंबाला आर्थिक हातभार लावत आहेत. महिलांच्या सक्षमीकरणासाठी केलेल्या उल्लेखनीय कार्याबद्दल त्यांना २०२४-२५ चा “बेस्ट टीचर अवॉर्ड” देऊन गौरविण्यात आले आहे.
सेंद्रिय आणि केमिकलमुक्त साबण निर्मिती हा त्यांचा विशेष चर्चेचा व्यवसाय ठरला आहे. कांदा, बटाटा, कोरफड आणि गुलाब यांसारख्या नैसर्गिक घटकांपासून त्या विविध प्रकारचे साबण तयार करतात. त्यांच्या या उत्पादनांना बाजारात मोठी मागणी असून अनेक वृत्तपत्रांनी त्यांच्या कार्याची दखल घेतली आहे.
याशिवाय त्या डॉग फार्मिंग, शेळीपालन, मांजर पालन, दळण गिरणी, आवळा कॅंडी निर्मिती आणि पेरू वडी निर्मिती असे विविध उद्योगही यशस्वीपणे सांभाळत आहेत.
सीमा सय्यद यांच्या घरातील असंख्य पुरस्कार, सन्मानचिन्हे आणि वर्तमानपत्रांमध्ये प्रसिद्ध झालेल्या यशोगाथा त्यांच्या कार्याची साक्ष देतात. महिलांनी जिद्द आणि आत्मविश्वासाच्या जोरावर कोणतेही क्षेत्र जिंकू शकते, हे त्यांनी आपल्या कार्यातून सिद्ध करून दाखवले आहे.
