गेवराई (प्रतिनिधी विष्णू गायकवाड) : चूल आणि मूल’ ही पारंपरिक चौकट मोडून एखादी महिला जेव्हा स्वतःच्या पायावर उभी राहते, तेव्हा ती केवळ एका कुटुंबाचा नाही, तर संपूर्ण समाजाचा विकास करते. आज आपण अशाच एका ‘सुपरवुमन’ची प्रेरणादायी यशोगाथा पाहणार आहोत. बीड जिल्ह्यातील आष्टी तालुक्यातील मुर्शिदपूरच्या सीमा बेगम जावेद सय्यद… ज्यांनी स्वतःच्या हिमतीवर घरबसल्या एक-दोन नव्हे, तर तब्बल १० व्यवसाय यशस्वीरीत्या चालवून ‘नारी शक्ती’चा एक नवा आदर्श महाराष्ट्रासमोर उभा केला आहे.
सीमा सय्यद यांचा ‘सीमा लेडीज टेलर्स’ नावाने व्यवसाय आणि शिवणक्लास चालतो. त्यांनी आतापर्यंत १०० पेक्षा जास्त महिलांना शिवणकामाचे यशस्वी प्रशिक्षण दिले आहे. त्यांच्या मार्गदर्शनाखाली शिकलेल्या या महिला आज स्वावलंबी होऊन कुटुंबाला आर्थिक हातभार लावत आहेत. त्यांच्या याच उत्कृष्ट कामगिरीची दखल घेत त्यांना नुकतेच २०२४-२०२५ च्या ‘बेस्ट टीचर अवॉर्ड’ने सन्मानित करण्यात आले आहे.
सीमा यांच्या यशाची कमान इथेच थांबत नाही. त्यांचा सर्वात नाविन्यपूर्ण उद्योग म्हणजे केमिकलमुक्त सेंद्रिय साबण निर्मिती! कांदा, बटाटा, कोरफड आणि गुलाब यांसारख्या नैसर्गिक घटकांपासून त्या दर्जेदार घरगुती साबण बनवतात, ज्याला बाजारात प्रचंड मागणी आहे. याव्यतिरिक्त डॉग फार्मिंग म्हणजेच श्वान पालन, शेळीपालन, मांजर पालन, दळणाची गिरणी, आणि आवळा कॅंडी तसेच पेरूची वडी निर्मिती असे तब्बल १० व्यवसाय त्या अतिशय कुशलतेने सांभाळतात.
सीमा यांच्या या जिद्दीची आणि कष्टांची दखल अनेक सामाजिक संस्था, कृषी विज्ञान केंद्रे आणि प्रसारमाध्यमांनी घेतली आहे. त्यांच्या घरातील भिंतीवर लागलेले असंख्य पुरस्कार आणि सन्मानचिन्हे त्यांच्या या अफाट कर्तृत्वाची साक्ष देतात. एखाद्या महिलेने मनात आणले तर ती कोणत्याही संकटावर मात करून यशाचे शिखर गाठू शकते, हेच सीमा सय्यद यांनी सिद्ध केले आहे. त्यांचा हा प्रवास महाराष्ट्रातील प्रत्येक ग्रामीण आणि शहरी महिलेला नवी ऊर्जा देणारा आहे.
