दौंड (प्रतिनिधी मयुर साळवे, संघराज गायकवाड )
दौंड पोलीस स्टेशनच्या पथकाने अपघाताचा बनाव करून टेम्पोमधील लाखो रुपयांचे खोबरे अपहार करणाऱ्या टोळीचा पर्दाफाश करत चार आरोपींना अटक केली आहे. या कारवाईत पोलिसांनी तब्बल 6,68,775 रुपये किमतीचे 3615 किलो खोबरे जप्त करण्यात यश मिळवले आहे.
मिळालेल्या माहितीनुसार, फिर्यादी भरत मारुल सिद्धाप्पा, रा. चिंकमंगळूर (कर्नाटक) यांनी त्यांचा आयशर टेम्पो क्र. MH 47 AS 5368 मधून खोबरे पुण्यातील गुलटेकडी येथे विक्रीसाठी पाठविले होते. वाहन चालक मनोज आंध्रेश बनसोडे याच्या ताब्यात हा माल देण्यात आला होता.
दि. 19 मे 2026 रोजी सकाळी चालकाने कुरकुंभ परिसरात टेम्पोचा अपघात होऊन वाहन पलटी झाल्याचे तसेच अज्ञात व्यक्तींनी खोबरे चोरी करून नेल्याचे फिर्यादीस सांगितले. मात्र घटनास्थळी पाहणीदरम्यान दौंड पोलिसांना प्रकार संशयास्पद वाटल्याने अधिक तपास करण्यात आला.
पोलीस चौकशीत चालक मनोज बनसोडे याने त्याचे साथीदार सुनील दत्तात्रेय लावरे, अनिकेत रावसाहेब पवार व तुषार लक्ष्मण जगताप यांच्या मदतीने खोबरे दुसऱ्या वाहनात भरून अपहार केल्याची कबुली दिली. चोरी लपवण्यासाठी अपघाताचा बनाव रचल्याचेही निष्पन्न झाले.
याप्रकरणी दौंड पोलीस स्टेशन येथे गु.र.नं. 329/2026 अन्वये भारतीय न्याय संहिता कलम 316(2) अंतर्गत गुन्हा दाखल करण्यात आला आहे. पोलिसांनी विशेष पथक तयार करून आरोपींना ताब्यात घेत अटक केली असून न्यायालयाने त्यांना 2 दिवसांची पोलीस कोठडी सुनावली आहे.
ही उल्लेखनीय कारवाई पोलीस निरीक्षक गोपाळ पवार यांच्या मार्गदर्शनाखाली पोलीस उपनिरीक्षक रुपेश कदम, बिद्री तसेच पोलीस अधिकारी व अंमलदारांच्या पथकाने यशस्वीरित्या पार पाडली.
