सिरोंचा, दि. ५ जून : जागतिक पर्यावरण दिनाचे औचित्य साधून सिरोंचा पोलीस स्टेशन येथे पर्यावरण संरक्षण व संवर्धनाबाबत जनजागृती करण्याच्या उद्देशाने विविध उपक्रमांचे आयोजन करण्यात आले. हा कार्यक्रम उपविभागीय पोलीस अधिकारी संदेश नाईक यांच्या प्रमुख उपस्थितीत तसेच पोलीस स्टेशनचे प्रभारी अधिकारी पोउपनि सोनवणे यांच्या मार्गदर्शनाखाली उत्साहात पार पडला.
कार्यक्रमाची सुरुवात पोलीस स्टेशन परिसरात स्वच्छता मोहिमेने करण्यात आली. यामध्ये पोलीस अधिकारी, अंमलदार तसेच एसआरपीएफ जवानांनी उत्स्फूर्त सहभाग घेत परिसर प्लास्टिकमुक्त व स्वच्छ करण्यासाठी श्रमदान केले. “स्वच्छता हीच सेवा” हा संदेश यावेळी देण्यात आला.
त्यानंतर पर्यावरण संवर्धनासाठी पोलीस स्टेशनच्या आवारात एकूण २८ फळझाडांची लागवड करण्यात आली. यामध्ये ८ आंबा, ७ पेरू, ५ नारळ आणि ८ सीताफळाच्या झाडांचा समावेश आहे. लावलेल्या झाडांच्या संगोपनाची जबाबदारी उपस्थित अधिकारी व कर्मचाऱ्यांनी स्वीकारली.
यावेळी पोउपनि सोनवणे यांनी हवामान बदल, वाढते तापमान आणि वृक्षसंवर्धनाचे महत्त्व विषद करत प्रत्येकाने किमान एक झाड लावून ते जगविण्याचे आवाहन केले. कार्यक्रमाच्या शेवटी सर्व उपस्थितांना पर्यावरण संरक्षण व संवर्धनाची शपथ देण्यात आली.
