सिरोंचा (प्रतिनिधी जाबिर खान) : व्यंकटापूर, दि. ५ जून जागतिक पर्यावरण दिनाचे औचित्य साधून अहेरी तालुक्यातील उप पोलीस स्टेशन व्यंकटापूर येथे पर्यावरण संरक्षण व संवर्धनाबाबत जनजागृती करण्यासाठी विविध उपक्रमांचे आयोजन करण्यात आले. पोउपनि राजु एस. गड्डापोड यांच्या मार्गदर्शनाखाली हा कार्यक्रम उत्साहपूर्ण वातावरणात पार पडला.
कार्यक्रमाची सुरुवात सार्वजनिक वाचनालय परिसरात वृक्षारोपण करून करण्यात आली. यावेळी उप पोलीस स्टेशन व्यंकटापूर येथील पोलीस अधिकारी व कर्मचारी, एसआरपीएफचे अधिकारी व जवान, पोलीस पाटील, सरपंच, उपसरपंच तसेच स्थानिक नागरिक मोठ्या संख्येने उपस्थित होते. सर्वांनी पर्यावरण संवर्धनाचा संदेश देत वृक्षारोपणात सक्रिय सहभाग घेतला.
यानंतर परिसरात स्वच्छता मोहीम राबविण्यात आली. प्लास्टिकमुक्त व स्वच्छ गाव निर्मितीचा संदेश देत नागरिकांनी श्रमदान केले. पर्यावरणविषयक घोषवाक्ये आणि संदेश असलेले फलक हातात घेऊन जनजागृती रॅलीही काढण्यात आली. यावेळी वृक्षसंवर्धन, जलसंधारण आणि स्वच्छतेचे महत्त्व याबाबत उपस्थितांना मार्गदर्शन करण्यात आले.
पोउपनि राजु एस. गड्डापोड यांनी प्रत्येक नागरिकाने किमान एक वृक्ष लावून त्याचे संगोपन करावे, असे आवाहन केले. तसेच “एक अधिकारी – एक वृक्ष” ही मोहीम राबवून पर्यावरण संवर्धनाचा संदेश देण्यात आला. कार्यक्रमाच्या शेवटी सर्व उपस्थितांना पर्यावरण संरक्षणाची शपथ देण्यात आली.
