पुणे (मुज्जम्मील शेख): पुणे रेल्वे पोलीस दलात नव्याने रुजू झालेले पोलीस अधीक्षक राजकुमार शिंदे यांच्या बदली प्रक्रियेबाबत सध्या पोलीस वर्तुळात मोठ्या प्रमाणावर चर्चा रंगली आहे. बदली प्रक्रियेदरम्यान कर्मचाऱ्यांकडून पसंतीची पाच ठिकाणे मागविण्यात आली होती. मात्र अनेक कर्मचाऱ्यांना त्यांनी नमूद केलेल्या पाच ठिकाणांऐवजी इतरच ठिकाणी नियुक्ती मिळाल्याचा दावा काही कर्मचाऱ्यांकडून करण्यात येत आहे.
सूत्रांच्या माहितीनुसार, अनेक कर्मचाऱ्यांनी आपल्या कौटुंबिक, आरोग्यविषयक व वैयक्तिक परिस्थितीचा विचार करून पसंतीची ठिकाणे नमूद केली होती. मात्र अंतिम बदली आदेशांमध्ये त्या ठिकाणांचा विचार न झाल्याने कर्मचाऱ्यांमध्ये नाराजीचे वातावरण निर्माण झाल्याची चर्चा आहे.
याच पार्श्वभूमीवर एका महिला कर्मचाऱ्याच्या बदलीबाबतही विविध चर्चा सुरू आहेत. संबंधित महिला कर्मचाऱ्यांची दूरस्थ ठिकाणी बदली करण्यात आल्याने त्यांनी नाराजी व्यक्त केल्याची माहिती सूत्रांकडून समोर येत आहे. त्यानंतर त्यांच्या नियुक्तीच्या ठिकाणात बदल करण्यात आल्याचेही बोलले जात आहे. मात्र या संदर्भातील अधिकृत माहिती अद्याप उपलब्ध झालेली नाही.
दरम्यान, रेल्वे पोलीस अधीक्षक कार्यालयाच्या कार्यपद्धतीबाबत आणखी एक महत्त्वाचा मुद्दा चर्चेत आला आहे. पुणे रेल्वे पोलीस अधीक्षकांच्या अखत्यारित असलेल्या विविध रेल्वे पोलीस ठाण्यांतील कर्मचाऱ्यांच्या बदल्या करण्यात आल्या असताना, काही कर्मचारी दीर्घकाळ एकाच कार्यालयात किंवा त्याच प्रशासकीय परिसरात कार्यरत असल्याचा दावा सूत्रांकडून केला जात आहे.
यामध्ये सुधीर जगताप (सहायक पोलीस उपनिरीक्षक), प्रमोद लांब (पोलीस हवालदार), शोभा गायकवाड, अशोक गलगटे (पोलीस उपनिरीक्षक) आणि माधुरी कांबळे या कर्मचाऱ्यांची नावे चर्चेत आहेत. सूत्रांच्या दाव्यानुसार, यापैकी काही कर्मचारी अनेक वर्षांपासून अधीक्षक कार्यालयात किंवा त्याच प्रशासकीय परिसरात कार्यरत आहेत.
त्यामुळे सर्वसामान्य कर्मचाऱ्यांच्या बदल्या मोठ्या प्रमाणावर करण्यात आल्या असताना, दीर्घकाळ एकाच ठिकाणी कार्यरत असलेल्या या कर्मचाऱ्यांबाबत कोणती भूमिका घेण्यात आली, असा प्रश्न पोलीस वर्तुळातून उपस्थित केला जात आहे. बदली धोरणाची अंमलबजावणी सर्वांसाठी समान निकषांवर झाली का, याबाबतही चर्चा सुरू आहे.
याबाबत पोलीस अधीक्षक राजकुमार शिंदे यांची अधिकृत प्रतिक्रिया मिळू शकलेली नाही. संबंधित अधिकारी व कर्मचाऱ्यांची बाजू समोर आल्यानंतरच या प्रकरणाचे संपूर्ण चित्र स्पष्ट होणार आहे. मात्र सध्या रेल्वे पोलीस दलात बदली प्रक्रियेच्या पारदर्शकतेबाबत आणि दीर्घकाळ एकाच ठिकाणी कार्यरत कर्मचाऱ्यांच्या बाबतीत प्रश्न उपस्थित होत असल्याचे चित्र दिसत आहे.
