सिरोंचा (प्रतिनिधि जाबिर खान): दिनांक 17/06/2026 रोजी पोलीस स्टेशन असरल्लीच्या पथकास गोपनीय माहिती प्राप्त झाली की, मागील अनेक वर्षांपासून फरार असलेला आरोपी *बापू व्यंकटी जनगम, रा. नडीकुडा* हा आपल्या मुलाबाळांना भेटण्यासाठी गावात आला आहे. प्राप्त माहितीच्या आधारे पोलिसांनी तात्काळ नियोजन करून नडीकुडा गावास घेराव घातला व शोधमोहीम राबविली. दरम्यान आरोपी हा नडीकुडा येथील शेतशिवार परिसरात आढळून आला. पोलिसांनी शिताफीने कारवाई करून त्यास ताब्यात घेऊन अटक केली.
सदर आरोपीविरुद्ध *मा. सत्र न्यायालय, अहेरी येथील फौजदारी मामला क्र. 01/2023 अंतर्गत कलम 307, 34 भा.दं.वि.* तसेच *मा. प्रथम श्रेणी न्यायालय, सिरोंचा येथील फौजदारी मामला क्र. 05/2026 अंतर्गत कलम 307, 353, 379, 143, 147, 148 भा.दं.वि.*अन्वये गैरजामीनपात्र अटक वॉरंट प्रलंबित होते.
याशिवाय आरोपीविरुद्ध पोलीस स्टेशन असरल्ली येथे गुन्हा क्र. 06/2015 कलम 302, 34 भा.दं.वि. ,अप क्र.03/2015 कलम 353,337,338,34 IPC,अप क्र.
13/2011 कलम 353,332,427,143,147,149 IPC,अप क्र
42/2011 कलम 307,353,379,427,143,147,149 IPC अप क्र
10/2007 कलम 304,34 IPC असे गंभीर स्वरूपाचे गुन्हे दाखल आहेत. गुन्हा क्र. 06/2015 मध्ये आरोपी हा मागील सुमारे 11 वर्षांपासून फरार होता. त्याच गुन्ह्यातील सहआरोपीस मा. जिल्हा व सत्र न्यायालय, गडचिरोली यांनी जन्मठेपेची शिक्षा सुनावलेली आहे.
सदर आरोपीचे नाव जी.आर.डी. (ग्राम रक्षक दल) यादीमध्ये समाविष्ट असून तो नक्षलवाद्यांना मदत करणाऱ्या जनमिलिशिया संघटनेशी संबंधित असल्याची नोंद आहे. आरोपी दीर्घकाळ पोलिसांना चकवा देत फरार राहत असल्याने त्याचा शोध घेण्यासाठी सातत्याने विशेष मोहिमा राबविण्यात येत होत्या.
अटक करण्यात आलेल्या आरोपीस मा. न्यायालयासमोर हजर करण्यात आले असून न्यायालयीन आदेशान्वये त्यास चंद्रपूर केंद्रीय कारागृहात दाखल करण्यात आले आहे.
दीर्घकाळ फरार असलेल्या व विविध गंभीर गुन्ह्यांमध्ये वांछित असलेल्या आरोपीस अटक करण्यात असरल्ली पोलिसांना यश आले असून या कारवाईमुळे नक्षलविरोधी अभियानास बळ मिळाले आहे. फरार आरोपींचा शोध घेणे व कायदा-सुव्यवस्था अबाधित राखणे यासाठी पोलीस विभागामार्फत विशेष कारवाया यापुढेही सुरू राहतील.
