तेहरान | वृत्तसंस्था
इराणचे सर्वोच्च नेते अयातुल्ला अली खामेनेई यांच्या अंत्यदर्शन आणि अंत्ययात्रेसाठी देशभरातून लाखो नागरिक तेहरानमध्ये दाखल होत असल्याने प्रशासनाने अभूतपूर्व सुरक्षा आणि आपत्कालीन तयारी केली आहे. प्रचंड गर्दी, उष्णतेची तीव्र लाट आणि संभाव्य चेंगराचेंगरीचा धोका लक्षात घेऊन १,५०० ते ३,००० मृत्यूंची शक्यता गृहीत धरत हजारो नवीन कबरी तयार ठेवण्यात आल्याचा दावा जर्मन वृत्तपत्र डाय वेल्ट (Die Welt) ने केला आहे.
या अहवालानुसार, तेहरानमधील बेहेश्त-ए-झहरा स्मशानभूमीत मोठ्या प्रमाणावर कबरी तयार करण्यात आल्या असून, मृत आणि बेपत्ता व्यक्तींची नोंद व व्यवस्थापन करण्यासाठी स्वतंत्र आपत्कालीन पथकही स्थापन करण्यात आले आहे. तेहरान महानगरपालिकेतील एका कर्मचाऱ्याने नाव न सांगण्याच्या अटीवर या तयारीला दुजोरा दिल्याचे वृत्त आहे.
खामेनेई यांच्या अंत्ययात्रेची सुरुवात तेहरानमधून झाली असून ती पुढे कोम, त्यानंतर इराकमधील नजफ आणि करबला या पवित्र शहरांतून मार्गक्रमण करणार आहे. अखेरीस मशहद येथे त्यांच्यावर अंत्यसंस्कार करण्यात येणार असल्याची माहिती आहे.
अंत्ययात्रेदरम्यान तेहरानमध्ये वाहतुकीवर निर्बंध घालण्यात आले असून, लाखो भाविकांच्या वाहतुकीसाठी हजारो बसची व्यवस्था करण्यात आली आहे. तात्पुरती भोजन व्यवस्था उभारण्यात आली असून, शाळा आणि मशिदींमध्ये बाहेरून येणाऱ्या नागरिकांच्या निवासाची सोय करण्यात आली आहे. राजधानीत कडेकोट सुरक्षा तैनात करण्यात आली असून हवाई क्षेत्रावरही निर्बंध लागू करण्यात आले आहेत.
इराणमध्ये यापूर्वीही मोठ्या अंत्ययात्रांमध्ये दुर्घटना घडल्या आहेत. २०२० मध्ये कासेम सुलेमानी यांच्या अंत्ययात्रेदरम्यान झालेल्या चेंगराचेंगरीत ५६ जणांचा मृत्यू झाला होता, तर १९८९ मध्ये अयातुल्ला रुहोल्ला खोमेनी यांच्या अंत्यसंस्कारावेळीही अनेकांचा बळी गेला होता. त्यामुळे यंदाच्या अंत्ययात्रेत प्रशासन कोणतीही जोखीम पत्करण्याच्या मनस्थितीत नाही.
दरम्यान, संभाव्य सुरक्षा धोक्यांच्या पार्श्वभूमीवर इराणी रिव्होल्युशनरी गार्ड कॉर्प्स (IRGC) ने कोणत्याही प्रकारच्या हल्ल्याचा प्रयत्न करणाऱ्यांना कठोर इशारा दिला आहे. इस्रायलकडून तसेच देशांतर्गत सक्रिय असलेल्या काही सशस्त्र गटांकडून धोका निर्माण होण्याची शक्यता गृहीत धरून सुरक्षा यंत्रणा सतर्क ठेवण्यात आली आहे.
विश्लेषकांच्या मते, लाखो नागरिकांची उपस्थिती, वरिष्ठ इराणी नेत्यांचा सहभाग आणि वाढलेले प्रादेशिक तणाव यामुळे ही अंत्ययात्रा इराणच्या इतिहासातील सर्वात मोठ्या आणि सर्वाधिक सुरक्षा व्यवस्थेखाली पार पडणाऱ्या कार्यक्रमांपैकी एक ठरणार आहे.
