दुधातील भेसळ रोखण्यासाठी FDA चे मोठे पाऊल; तुकाराम मुंडेंची नवी नियमावली, उत्पादक-विक्रेत्यांवर राहणार कडक नजर
मुंबई : अन्न व औषध प्रशासन (FDA) विभागाचे आयुक्त म्हणून पदभार स्वीकारल्यानंतर तुकाराम मुंडे यांनी राज्यभर भेसळ आणि बेकायदेशीर अन्नपदार्थांविरोधात धडक मोहीम सुरू केली आहे. हॉटेल्स, खाद्यपदार्थ विक्रेते आणि भेसळीचा संशय असलेल्या ठिकाणी सातत्याने कारवाई केल्यानंतर आता त्यांनी दुधातील भेसळीवर लक्ष केंद्रित केले आहे.
यापूर्वी महाराष्ट्रात बंदी असलेल्या गुटखा, गोवा आणि इतर तंबाखूजन्य पदार्थांच्या बेकायदेशीर विक्रीविरोधातही मुंडे यांनी कठोर भूमिका घेतली होती. अशा प्रकरणांमध्ये आरोपींवर मोक्का (MCOCA) अंतर्गत कारवाई करण्याचा इशारा त्यांनी दिला होता.
आता ग्राहकांना शुद्ध आणि दर्जेदार दूध मिळावे यासाठी FDA कडून व्यापक उपाययोजना हाती घेण्यात येत आहेत. “ग्राहकांच्या ताटापर्यंत भेसळमुक्त दूध पोहोचणे हा त्यांचा हक्क आहे,” असे सांगत मुंडे यांनी दूध व्यवसायाशी संबंधित सर्व घटकांसाठी नवीन नियम लागू करण्यात येणार असल्याची माहिती दिली.
या पार्श्वभूमीवर दूध उत्पादकांची विशेष बैठक घेण्यात आली असून, दूध उत्पादनापासून ते विक्रीपर्यंतच्या संपूर्ण पुरवठा साखळीवर अधिक प्रभावी नियंत्रण ठेवण्याचा निर्णय घेण्यात आला आहे.
या घटकांवर लागू होणार नवे नियम
- दूध संकलन केंद्रे
- दूध शीतकरण केंद्रे
- दुग्ध प्रक्रिया युनिट्स
- दूध उत्पादक
- वितरक
- वाहतूकदार
- घाऊक विक्रेते
- किरकोळ विक्रेते
याशिवाय पनीर, खवा, तूप, दही, चीज आणि दूध पावडर यांसारख्या सर्व दुग्धजन्य उत्पादनांनाही नव्या नियमांच्या कक्षेत आणण्यात येणार आहे.
FDA च्या या निर्णयामुळे दुधात भेसळ करणाऱ्यांवर अधिक कठोर कारवाई होण्याची शक्यता व्यक्त केली जात आहे. त्यामुळे राज्यातील ग्राहकांना शुद्ध, सुरक्षित आणि दर्जेदार दूध व दुग्धजन्य पदार्थ उपलब्ध करून देण्याच्या दिशेने हा महत्त्वाचा निर्णय मानला जात आहे. भेसळीविरोधातील कारवाई अधिक प्रभावी करण्यासाठी FDA लवकरच नव्या नियमांची अंमलबजावणी सुरू करणार असल्याचेही स्पष्ट करण्यात आले आहे.
