IND vs ENG: दुसऱ्या टी-20पूर्वी जाणून घ्या भारत-इंग्लंड लढतीतील मोठे फलंदाजी विक्रम; बटलर अव्वल, कोहली-रोहितही यादीत
मँचेस्टर : भारत आणि इंग्लंड यांच्यातील पाच सामन्यांच्या टी-20 आंतरराष्ट्रीय मालिकेतील पहिला सामना पावसामुळे रद्द झाला. आता मालिकेतील दुसरा सामना 4 जुलै रोजी मँचेस्टरच्या ओल्ड ट्रॅफर्ड मैदानावर रंगणार आहे. या महत्त्वाच्या सामन्यापूर्वी भारत-इंग्लंड टी-20 लढतीतील काही खास फलंदाजी विक्रमांवर नजर टाकूया.
भारताविरुद्ध सर्वाधिक धावा; बटलर पहिल्या स्थानावर
भारत आणि इंग्लंड यांच्यात झालेल्या टी-20 आंतरराष्ट्रीय सामन्यांमध्ये सर्वाधिक धावा करण्याचा विक्रम इंग्लंडचा अनुभवी फलंदाज जोस बटलर याच्या नावावर आहे. बटलरने भारताविरुद्ध 29 सामन्यांत 669 धावा केल्या आहेत.
या यादीत भारताचा माजी कर्णधार विराट कोहली दुसऱ्या स्थानावर असून, त्याने इंग्लंडविरुद्ध 21 सामन्यांत 648 धावा केल्या आहेत. रोहित शर्मा 16 सामन्यांत 467 धावांसह तिसऱ्या क्रमांकावर आहे. विशेष म्हणजे, विराट आणि रोहित या दोघांनीही टी-20 आंतरराष्ट्रीय क्रिकेटमधून निवृत्ती घेतली आहे.
सर्वात मोठ्या वैयक्तिक खेळीचा विक्रम अभिषेक शर्माच्या नावावर
भारत-इंग्लंड टी-20 सामन्यांतील सर्वोच्च वैयक्तिक धावसंख्या अभिषेक शर्मा याच्या नावावर आहे. त्याने 2025 मध्ये मुंबईतील वानखेडे स्टेडियमवर इंग्लंडविरुद्ध अवघ्या 54 चेंडूत 135 धावांची तुफानी खेळी केली होती. या डावात त्याने 7 चौकार आणि 13 षटकारांची आतषबाजी केली होती.
या यादीत सूर्यकुमार यादव दुसऱ्या स्थानावर आहे. त्याने 2022 मध्ये नॉटिंगहॅम येथे 55 चेंडूत 117 धावांची खेळी करत 14 चौकार आणि 6 षटकार ठोकले होते.
सर्वाधिक चौकारांचा विक्रम
भारत-इंग्लंड टी-20 सामन्यांमध्ये सर्वाधिक चौकार मारण्याच्या बाबतीत जोस बटलर आणि विराट कोहली संयुक्तपणे अव्वल आहेत. दोघांनीही प्रत्येकी 61 चौकार मारले आहेत.
- जोस बटलर – 61 चौकार (29 सामने)
- विराट कोहली – 61 चौकार (21 सामने)
- रोहित शर्मा – 49 चौकार (16 सामने)
- सूर्यकुमार यादव – 38 चौकार
षटकारांचा बादशाहही बटलरच
सर्वाधिक षटकार मारण्याच्या यादीतही जोस बटलर पहिल्या क्रमांकावर आहे. त्याने भारताविरुद्ध 29 सामन्यांत 28 षटकार लगावले आहेत.
- जोस बटलर – 28 षटकार
- हार्दिक पांड्या – 27 षटकार
- अभिषेक शर्मा – 26 षटकार (7 सामने)
- जेसन रॉय – 20 षटकार
सर्वोत्तम फलंदाजी सरासरी
भारत-इंग्लंड टी-20 सामन्यांमध्ये सर्वोत्तम फलंदाजी सरासरीचा विक्रम इंग्लंडच्या रवी बोपारा यांच्या नावावर आहे. त्यांनी चार डावांत 103 धावा करत 103 ची सरासरी राखली असून, त्यापैकी तीन वेळा ते नाबाद राहिले.
या यादीत वीरेंद्र सेहवाग 68 च्या सरासरीसह दुसऱ्या, डेव्हिड विली 66 च्या सरासरीसह तिसऱ्या, तर अभिषेक शर्मा सात सामन्यांत 347 धावा करत चौथ्या स्थानावर आहे.
मँचेस्टरमध्ये होणाऱ्या दुसऱ्या टी-20 सामन्यात हे विक्रम मोडले जातात का, याकडे आता क्रिकेटप्रेमींचे लक्ष लागले आहे.
