अनेकजण आयुष्यभर स्वतःची कंपनी उभारण्याचे स्वप्न पाहतात. मात्र भारतीय वंशाच्या जैनम जैन यांनी अवघ्या 14 व्या वर्षी ते स्वप्न प्रत्यक्षात उतरवले आहे. त्यांनी आर्टिफिशियल इंटेलिजन्स (AI) क्षेत्रातील ‘मेंगो इंजिन’ (Mango Engine) या स्टार्टअपची स्थापना केली असून, दुबईतील सर्वात तरुण AI स्टार्टअप संस्थापक म्हणून त्यांची ओळख निर्माण झाली आहे.
विशेष म्हणजे, त्यांच्या स्टार्टअपचे कार्यालय जगातील सर्वात उंच इमारत बुर्ज खलिफाच्या 141 व्या मजल्यावर आहे. एवढ्याच वयात जैनम यांनी AI क्षेत्रात उल्लेखनीय कामगिरी करत उद्योजकतेचे नवे उदाहरण घालून दिले आहे.
स्टार्टअप नेमके काय करते?
‘मेंगो इंजिन’ हे AI-आधारित प्लॅटफॉर्म व्यवसायांना त्यांचे मार्केटिंग, ग्राहक संवाद, विक्री प्रक्रिया आणि कंटेंट निर्मिती अधिक वेगवान व स्वयंचलित करण्यास मदत करते.
एका मुलाखतीत जैनम यांनी सांगितले की, कृत्रिम बुद्धिमत्ता (AI) हा शब्द लोकप्रिय होण्यापूर्वीच या कल्पनेवर काम सुरू झाले होते. हे प्लॅटफॉर्म कंपन्यांना लीड मॅनेजमेंट, न्यूजलेटर्स, ग्राहकांशी संवाद आणि डिजिटल मार्केटिंगसारखी अनेक कामे सुलभ करण्यास मदत करते. सध्या हे प्लॅटफॉर्म बीटा टप्प्यात असून अनेक कंपन्या त्याचा वापर करण्यासाठी उत्सुक आहेत.
TEDx वक्ते, लेखक आणि पेटंटधारक
उद्योजकतेसोबतच जैनम जैन हे TEDx वक्ते आहेत. त्यांच्या नावावर दोन पेटंट नोंदवले गेले असून आणखी काही पेटंट प्रक्रियेत आहेत. त्यांनी एक पुस्तकही लिहिले आहे. याशिवाय त्यांच्या यूट्यूब चॅनेलवर 1.45 लाखांहून अधिक सदस्य आहेत.
वयाच्या सहाव्या वर्षी मिळाला उद्योजकतेचा धडा
‘कर्ली टेल्स मिडल ईस्ट’ला दिलेल्या मुलाखतीत जैनम यांनी सांगितले की, त्यांना उद्योजकतेची प्रेरणा वयाच्या सहाव्या वर्षी मिळाली.
त्यांच्या म्हणण्यानुसार, “मी सहा वर्षांचा असताना माझे वडील मला पहिल्या व्यावसायिक बैठकीला घेऊन गेले. त्या अनुभवातून व्यवसाय कसा चालतो, लोकांशी संवाद कसा साधायचा आणि संधी कशा शोधायच्या याबद्दल माझ्या मनात कुतूहल निर्माण झाले.”
यानंतर त्यांनी विविध उद्योगक्षेत्रातील लोकांना भेटणे, व्यावसायिक कार्यक्रमांमध्ये सहभागी होणे आणि प्रत्यक्ष अनुभवातून शिकणे सुरू ठेवले.
पारंपरिक शिक्षणाऐवजी वेगळी वाट
जैनम यांनी पारंपरिक शिक्षणाचा मार्ग न निवडता स्वतःच्या पद्धतीने शिक्षण आणि कौशल्य विकासावर भर दिला. त्यामुळे त्यांना उद्योजकतेवर अधिक वेळ देता आला आणि आपल्या कल्पना प्रत्यक्षात आणण्याची संधी मिळाली.
स्वतःलाच दिली 50 दिवसांची आव्हाने
एका मुलाखतीत जैनम यांनी सांगितले की, त्यांचे ध्येय जागतिक स्तरावर प्रभाव टाकणारी युनिकॉर्न कंपनी उभारण्याचे आहे.
हे स्वप्न पूर्ण करण्यासाठी त्यांनी अवघ्या 10 व्या वर्षापासून स्वतःलाच 50 दिवसांची विविध आव्हाने दिली. यामध्ये 50 पुस्तके वाचणे, 50 नेटवर्किंग कार्यक्रमांना उपस्थित राहणे आणि देशभरातील उद्योजकांना भेटण्यासाठी सुमारे 6,000 किलोमीटरचा प्रवास करणे यांचा समावेश होता.
अवघ्या 14 व्या वर्षी स्टार्टअप, पेटंट, TEDx व्याख्याने, पुस्तक लेखन आणि डिजिटल समुदाय उभारून जैनम जैन यांनी वय हे यशाचे बंधन नसल्याचे पुन्हा एकदा सिद्ध करून दाखवले आहे.
