वाळूज:(प्रतिनिधी पांडुरंग गायकवाड) वाळूज एमआयडीसीतील बजाजनगर परिसरात तब्बल सहा महिन्यांनंतर अतिक्रमण हटाव मोहिमेला आज (दि. १३ जुलै) सुरुवात करण्यात आली. एमआयडीसी प्रशासन, महसूल विभाग, पोलीस प्रशासन आणि संबंधित विभागांच्या संयुक्त पथकाने ही कारवाई हाती घेतली असून १३ व १४ जुलै असे सलग दोन दिवस ही मोहीम राबविण्यात येणार आहे.
बजाजनगर परिसरातील रस्ते, पदपथ, सार्वजनिक जागा तसेच शासकीय जागेवरील अनधिकृत दुकाने, पत्र्याचे शेड, हातगाड्या आणि इतर अतिक्रमणे जेसीबी व इतर यंत्रसामग्रीच्या साहाय्याने हटविण्यात येत आहेत. कारवाईदरम्यान कोणताही अनुचित प्रकार घडू नये म्हणून मोठा पोलीस बंदोबस्त तैनात करण्यात आला आहे.
अतिक्रमणामुळे वाहतूक कोंडी, नागरिकांना होणारा त्रास आणि सार्वजनिक जागेचा होत असलेला गैरवापर लक्षात घेऊन ही मोहीम राबविण्यात येत असल्याचे प्रशासनाने सांगितले. या कारवाईमुळे परिसरातील रस्ते मोकळे होऊन वाहतूक सुरळीत होण्यास मदत होणार असून नागरिकांनीही प्रशासनाच्या कारवाईला सहकार्य करण्याचे आवाहन करण्यात आले आहे.
