दौंड (प्रतिनिधी संघराज गायकवाड,मयुर साळवे) :- शहरातील अनधिकृत होर्डिंग, फ्लेक्स, बॅनर व पोस्टर याबाबत होणाऱ्या कारवाईत पारदर्शकता नसल्याचा आरोप करत बहुजन समाज पक्षाच्या वतीने दौंड नगरपरिषद प्रशासनास निवेदन देण्यात आले. बहुजन समाज पार्टीचे दौंड शहराध्यक्ष हर्षल राजू पाटोळे यांच्या नेतृत्वाखाली पदाधिकारी व कार्यकर्त्यांनी नगरपरिषदेचे मुख्याधिकारी यांची भेट घेऊन ही मागणी मांडली.
दौंड शहरातील सार्वजनिक तसेच खासगी ठिकाणी मोठ्या प्रमाणावर होर्डिंग, फ्लेक्स व बॅनर लावले जात असून त्यासाठी ठोस नियमावली आणि स्पष्ट कार्यपद्धती (SOP) नसल्याने नागरिकांमध्ये संभ्रम निर्माण झाला आहे. नगरपरिषदेने यापूर्वी मंजूर केलेल्या ठरावांची अंमलबजावणी होत नसल्याचा आरोपही निवेदनात करण्यात आला आहे. कोणत्या आधारावर परवानगी दिली जाते, किती शुल्क आकारले जाते आणि अनधिकृत होर्डिंगवर कोणती कारवाई होते, याची माहिती नागरिकांना उपलब्ध नाही, असेही नमूद करण्यात आले.
दौंड नगरपरिषदेच्या अधिकृत संकेतस्थळावर होर्डिंग, फ्लेक्स व बॅनर यांच्यासाठीची जागा निश्चिती, शुल्क आकारणी, परवानगी प्रक्रिया तसेच कारवाईची सविस्तर माहिती प्रसिद्ध करावी, अशी मागणी करण्यात आली आहे. यामुळे प्रशासनातील पारदर्शकता वाढून नागरिकांचा विश्वास अधिक दृढ होईल, असे मत व्यक्त करण्यात आले.
यावेळी बहुजन समाज पक्षाचे पदाधिकारी, कार्यकर्ते मोठ्या संख्येने उपस्थित होते. दौंड शहर स्वच्छ, सुंदर व नियोजनबद्ध राहावे यासाठी नगरपरिषद प्रशासनाने तातडीने निर्णय घ्यावा, अन्यथा बहुजन समाज पक्षाच्या वतीने तीव्र आंदोलन छेडण्यात येईल, असा इशाराही यावेळी देण्यात आला.
