रुपेश देशमुख (ब्रह्मपुरी प्रतिनिधी) ब्रह्मपुरी हे महाराष्ट्र राज्यातील चंद्रपूर जिल्ह्यातील शिक्षण व आरोग्य सुविधांसाठी ओळखले जाणारे शांत शहर म्हणून प्रसिद्ध आहे. ग्रामीण भागातील विद्यार्थ्यांसाठी ब्रह्मपुरी हे शिक्षणाचे माहेरघर मानले जाते. मात्र अलीकडच्या काळात शहरात ड्रग्स, सुगंधी तंबाखू आणि अवैध देशी दारू विक्री वाढत असल्याच्या तक्रारी समोर येत आहेत.
स्थानिक नागरिकांच्या म्हणण्यानुसार, काही भागांत खुलेआम नशावस्तूंची विक्री होत असून त्यामुळे तरुणाईवर विपरीत परिणाम होत आहे. कायदा व सुव्यवस्थेचा प्रश्न निर्माण होत असल्याची भावना व्यक्त केली जात आहे. विशेष म्हणजे पोलीस ठाण्याच्या परिसरातच अवैध व्यवहार सुरू असल्याच्या चर्चेमुळे आश्चर्य व्यक्त होत आहे.
जिल्हा पोलीस प्रशासनाने अवैध धंद्यांवर नियंत्रणासाठी स्वतंत्र पथके स्थापन केली असली, तरी त्यांची प्रभावी अंमलबजावणी होत नसल्याचा आरोप काही नागरिकांनी केला आहे. ब्रह्मपुरी व आसपासच्या ग्रामीण भागात अवैध दारू पुरवठा होत असल्याच्याही तक्रारी वाढत आहेत.
या पार्श्वभूमीवर जिल्हा पोलीस अधीक्षकांनी तातडीने लक्ष घालून कारवाई करावी, अशी मागणी ब्रह्मपुरीकरांकडून होत आहे. शहराची शांतता आणि तरुणांचे भविष्य सुरक्षित ठेवण्यासाठी ठोस पावले उचलली जातील का, याकडे सर्वांचे लक्ष लागले आहे.
