प्रवीण चौधरी (परभणी प्रतिनिधी) : मानवत तालुक्यातील मंगरुळ परिसरात घडलेल्या शेळी-बोकड चोरी प्रकरणाचा उलगडा करण्यात स्थानिक गुन्हा शाखेला यश आले असून एका आरोपीला ताब्यात घेण्यात आले आहे. आरोपीच्या घरातून सुमारे २१ हजार रुपये किमतीचा बोकड जप्त करण्यात आला आहे.
याबाबत मिळालेल्या माहितीनुसार, मानवत पोलीस ठाण्यात गुरनं ७४/२०२६ अन्वये भारतीय न्याय संहिता कलम ३०३ (२) प्रमाणे गुन्हा नोंद करण्यात आला होता. संबंधित तक्रारीनंतर पोलिसांनी तपासाची चक्रे वेगाने फिरवली. दरम्यान मंगळवारी (दि. २४) स्थानिक गुन्हा शाखेचे अधिकारी विवेकानंद पाटील, रंगनाथ दुधाटे, चंदनसिंह परीहार आदींचे पथक गस्तीवर असताना त्यांना साखला प्लॉट परिसरात संशयित हालचालीबाबत गोपनीय माहिती मिळाली.
माहितीनुसार राहुलसिंग दारासिंग दुधानी (रा. साखला प्लॉट परिसर) याने मानवत तालुक्यातील मंगरुळ येथून शेळी व बोकड चोरी केल्याचे निष्पन्न झाले. त्यानुसार पोलिसांनी तत्काळ आरोपीच्या घरावर छापा टाकला. या कारवाईदरम्यान घरातून २१ हजार रुपये किमतीचा बोकड जप्त करण्यात आला.
प्राथमिक चौकशीत आरोपीने कालासिंग गुरुबच्चनसिंग दुधानी यांच्या मदतीने दुचाकीवरून जनावरे चोरी केल्याची कबुली दिली आहे. चोरी केलेली जनावरे इतरत्र विक्री करण्याचा त्यांचा उद्देश असल्याचा संशय पोलिसांनी व्यक्त केला आहे.
स्थानिक गुन्हा शाखेने आरोपीस पुढील कायदेशीर कारवाईसाठी मानवत पोलीस ठाण्याकडे सुपूर्द केले असून फरार असलेल्या अन्य साथीदाराचा शोध सुरू आहे. या कारवाईमुळे परिसरातील जनावरांच्या चोरीच्या घटनांवर आळा बसण्याची शक्यता व्यक्त केली जात आहे.
दरम्यान, नागरिकांनी आपल्या जनावरांची योग्य ती काळजी घ्यावी तसेच संशयास्पद हालचाली आढळल्यास त्वरित पोलिसांना कळवावे, असे आवाहन पोलिस प्रशासनाकडून करण्यात आले आहे.
