दौंड( प्रतिनिधी मयुर साळवे संघराज गायकवाड): पोलीस निरीक्षक हेमंत शेडंगे यांच्या मार्गदर्शनाखाली दौंड शहरात वाहतूक नियमांचे उल्लंघन करणाऱ्या दुचाकीस्वारांविरोधात विशेष मोहीम राबविण्यात आली. या मोहिमेदरम्यान ट्रिपल सीट प्रवास करणाऱ्या १८ दुचाकीस्वारांवर कारवाई करण्यात आली.
दौंड पोलिसांकडून यापूर्वीही बुलेट मोटारसायकलींमध्ये मोडिफिकेशन करून कर्णकर्कश आवाज करणारे सायलेन्सर बसविणाऱ्या वाहनांवर कारवाई करण्यात आली होती. त्याच धर्तीवर वाहतूक शिस्तीचे पालन व्हावे यासाठी ही मोहीम राबविण्यात आली.
पोलीस निरीक्षक हेमंत शेडंगे यांनी नागरिकांना वाहतूक नियमांचे पालन करण्याचे आवाहन केले असून, यापुढेही विनापरवाना वाहन चालविणे, अल्पवयीन मुलांना वाहन चालविण्यास देणे, तसेच इतर वाहतूक नियमांचे उल्लंघन करणाऱ्यांवर कठोर कारवाई करण्यात येणार असल्याचे सांगितले.
सदर कारवाईमध्ये ग्रेड पीएसआय चौधरी, ग्रेड पीएसआय साळुंखे, पोलीस हवालदार अमीर शेख, पोलीस हवालदार निखिल जाधव, पोलीस कॉन्स्टेबल अर्जुन नरळे आणि पोलीस कॉन्स्टेबल करमचंद बंडगर यांनी सहभाग घेतला. पोलिसांच्या या कारवाईमुळे वाहतूक नियमांचे उल्लंघन करणाऱ्यांमध्ये धाक निर्माण झाला आहे.
