सिन्नर:(प्रतिनिधी नवनाथ आव्हाड) नाशिक येथील मातोश्री एज्युकेशन सोसायटी संचलित मातोश्री अभियांत्रिकी महाविद्यालय व संशोधन संस्था येथे अभियांत्रिकी विज्ञान विभागाच्या वतीने प्राध्यापकांची शैक्षणिक गुणवत्ता अधिक प्रभावी करण्याच्या उद्देशाने विशेष प्रशिक्षण शिबिराचे आयोजन करण्यात आले. “ई-कंटेंट : MOOCs आणि Moodle” या विषयावर आधारित या प्रशिक्षणात प्राध्यापकांना डिजिटल व ऑनलाइन शिक्षणाच्या आधुनिक पद्धतींचे मार्गदर्शन करण्यात आले.
या प्रशिक्षणाचे आयोजन विभागप्रमुख प्रा. डॉ. डी. डी. अहिरे यांच्या मार्गदर्शनाखाली करण्यात आले. प्रा. डॉ. पी. एस. बनसुडे आणि प्रा. रेश्मा कडाळे यांनी प्रमुख मार्गदर्शक म्हणून उपस्थित राहून डिजिटल माध्यमातून प्रभावी अध्यापन, ई-कंटेंट निर्मिती तसेच आधुनिक अध्यापन तंत्रांबाबत सविस्तर माहिती दिली.
प्रशिक्षणादरम्यान प्राध्यापकांनी संगणकावर प्रत्यक्ष प्रात्यक्षिके करून नवीन ऑनलाइन अभ्यासक्रम तयार करणे, अभ्याससाहित्य अपलोड करणे, Moodle प्लॅटफॉर्मवर ऑनलाइन परीक्षा घेणे आणि विद्यार्थ्यांचा सहभाग वाढविण्यासाठी डिजिटल साधनांचा प्रभावी वापर कसा करावा, याचे प्रशिक्षण घेतले.
या उपक्रमामुळे प्राध्यापकांना आधुनिक तंत्रज्ञानाचा वापर करून अधिक दर्जेदार, प्रभावी आणि विद्यार्थी-केंद्रित अध्यापन करता येणार असून त्याचा थेट लाभ विद्यार्थ्यांना होणार आहे. महाविद्यालयातील या अभिनव उपक्रमाचे सर्व स्तरांतून कौतुक होत आहे.
महाविद्यालयाचे संचालक डॉ. जी. के. खराटे म्हणाले, “या प्रशिक्षण शिबिरामुळे आधुनिक तंत्रज्ञानाचा प्रभावी वापर करून ज्ञानदान अधिक परिणामकारक होईल आणि त्याचा विद्यार्थ्यांना निश्चितच फायदा होईल.”
विभागप्रमुख प्रा. डॉ. डी. डी. अहिरे यांनी सांगितले, “प्राध्यापकांची गुणवत्ता वाढली तरच विद्यार्थ्यांपर्यंत ज्ञान अधिक प्रभावीपणे पोहोचते. त्यासाठीच हा प्रशिक्षण कार्यक्रम आयोजित करण्यात आला.”
