परभणी (प्रतिनिधी अनिल शेटे) : येथील बसस्थानकात सध्या NCMC (नॅशनल कॉमन मोबिलिटी कार्ड) काढण्याची प्रक्रिया सुरू असताना, प्रवाशांमध्ये विविध अफवा पसरत असल्याचे दिसून येत आहे. विशेषतः NCMC कार्ड नसल्यास बस प्रवासातील सवलती मिळणार नाहीत, अशी चुकीची माहिती काही ठिकाणी फिरत आहे.
मात्र, या सर्व अफवा पूर्णपणे निराधार असल्याचे गंगाखेड बस आगाराचे वाहतूक निरीक्षक दीपक मुंढे यांनी स्पष्ट केले आहे. त्यांनी सांगितले की, NCMC कार्ड नसले तरीही प्रवाशांना महाराष्ट्र राज्य मार्ग परिवहन महामंडळाच्या (एस.टी.) सर्व सवलती पूर्वीप्रमाणेच मिळत राहणार आहेत.
प्रवासी आधार कार्ड, मतदान ओळखपत्र यांसारखी वैध कागदपत्रे दाखवून अमृत ज्येष्ठ नागरिक योजना, ज्येष्ठ नागरिक सवलत, तसेच महिला सन्मान योजना यांचा लाभ सहज घेऊ शकतात, असेही त्यांनी स्पष्ट केले.
दरम्यान, ज्यांनी अद्याप NCMC कार्ड काढलेले नाही, त्यांनी गंगाखेड आगारात जाऊन ते काढून घ्यावे, असे आवाहनही करण्यात आले आहे. नागरिकांनी कोणत्याही अफवांवर विश्वास न ठेवता अधिकृत माहितीलाच प्राधान्य द्यावे, असेही मुंढे यांनी सांगितले.
मतदान ओळखपत्र आणि आधार कार्ड ही कागदपत्रे अमृत ज्येष्ठ नागरिक योजना, ज्येष्ठ नागरिक सवलत व महिला सन्मान योजना यासाठी वैध राहणार आहेत. त्यामुळे लाभार्थ्यांना पूर्वीप्रमाणेच प्रवास सवलतींचा लाभ मिळणार आहे.
