गेवराई (प्रतिनिधी विष्णू गायकवाड) : संभाजीनगर जिल्ह्यातील फुलंब्री तालुक्यातील वाहेगाव या छोट्याशा गावाने एक मोठा मानाचा क्षण अनुभवला आहे. येथील श्रद्धा संदीप श्रीखंडे हिने पोलीस कॉन्स्टेबल पदावर निवड होऊन गावाच्या इतिहासात आपले नाव सुवर्णाक्षरांनी नोंदवले आहे. वाहेगाव गावातील पहिली महिला पोलीस कॉन्स्टेबल होण्याचा मान श्रद्धा हिने मिळवला असून, तिच्या या यशामुळे संपूर्ण गावात आनंदाचे वातावरण आहे.
श्रद्धा श्रीखंडे हिची यवतमाळ जिल्हा पोलीस दलामध्ये पोलीस कॉन्स्टेबल पदावर निवड झाली आहे. अत्यंत साध्या आणि कष्टकरी कुटुंबातून आलेल्या श्रद्धाने आपल्या जिद्द, चिकाटी आणि अथक परिश्रमांच्या जोरावर हे यश संपादन केले आहे.
श्रद्धाचे वडील संदीप लक्ष्मण श्रीखंडे हे शेतकरी असून त्यांनी आपल्या मुलगा-मुलगी असा कोणताही भेदभाव न करता सर्व मुलांना समान शिक्षण दिले. कुटुंबात तीन मुली आणि एक मुलगा असून, सर्व मुलींना उच्च शिक्षण देऊन त्यांची स्वप्ने पूर्ण करण्यासाठी त्यांनी मोठा संघर्ष केला. त्यांच्या या सकारात्मक विचारसरणीमुळेच आज श्रद्धा यशाच्या शिखरावर पोहोचली आहे.
अत्यंत कठीण परिस्थितीतही श्रद्धाने हार न मानता दिवस-रात्र मेहनत घेतली. अभ्यासासोबतच शारीरिक तयारी करून तिने पोलीस भरतीची कठीण परीक्षा यशस्वीरीत्या पार केली. तिच्या या यशामुळे ती केवळ आपल्या कुटुंबासाठीच नव्हे, तर संपूर्ण गावासाठी अभिमानाचा विषय ठरली आहे.
श्रद्धाच्या यशानंतर वाहेगाव गावातील सरपंच बळवंत पळसकर माजी सरपंच कमलाकर श्रीखंडे प्रवीण श्रीखंडे व रतन श्रीखंडे व तसेच गावातील प्रतिष्ठित मान्यवर यांच्या हस्ते या महिला कॉन्स्टेबलचा सत्कार केला तिचा जंगी सत्कार करण्यात आला. गावकऱ्यांनी मोठ्या उत्साहात तिचे स्वागत करत शुभेच्छांचा वर्षाव केला.
श्रद्धा श्रीखंडे हिचा हा संघर्ष आणि यशाचा प्रवास इतर ग्रामीण भागातील मुलींसाठी प्रेरणादायी ठरत आहे. “परिस्थिती कितीही कठीण असली तरी जिद्द आणि मेहनतीच्या जोरावर यश मिळवता येते,” हा संदेश तिच्या यशातून स्पष्टपणे दिसून येतो.
वाहेगाव गावासाठी हा ऐतिहासिक क्षण असून, भविष्यातही अशाच प्रकारे गावातील मुली विविध क्षेत्रात प्रगती करून गावाचे नाव उज्ज्वल करतील, अशी अपेक्षा व्यक्त होत आहे.
