Times of Maharashtra Desk पुणे :- पुणे महानगरपालिकेच्या घनकचरा विभागातील १८ ऑक्टोबर २०२५ च्या आदेशाने मनपा प्रशासनाचा गलथान, व्यक्तीविशेषाभोवती फिरणारा आणि वरिष्ठतेचा पुरता बोजवारा उडवणारा कारभार पुन्हा एकदा समोर आला आहे. उपआयुक्त विजयकुमार थोरात यांच्या सहीने काढलेल्या आदेशानुसार आरोग्य निरीक्षक नवनाथ शेलार यांना वरिष्ठ आरोग्य निरीक्षक म्हणून पूर्णवेळ पदभार देण्यात आला आहे. पण प्रश्न असा—१३ जानेवारी २०२५ रोजी प्रसिद्ध झालेल्या अधिकृत जेष्ठता यादीत शेलार १३६व्या क्रमांकावर असताना, त्याच्यापुढे असलेले १३५ अधिकारी काय निष्क्रिय होते? आणि मनपा प्रशासनाला ते दिसलेच नाहीत का?
हेच नाही, तर १४ ऑगस्ट २०२५ रोजी नुकतीच बदली झालेल्या या अधिकाऱ्याला पुन्हा फक्त दोन महिन्यांत अगोदरच्याच भागात बसवले जाणे हा स्पष्ट संशयाचा वास देणारा प्रकार आहे. ज्या अधिकाऱ्याला दोन महिन्यापूर्वी बदलीची गरज होती, तोच अचानक वरिष्ठ पदासाठी “सर्वात योग्य” कसा झाला, हा प्रश्न प्रशासनातील ‘फोन कॉल, सेटिंग आणि ऑर्डर मॅनेजमेंट’ संस्कृतीकडे थेट बोट दाखवणारा आहे.
यावर अधिकाऱ्यांकडे विचारणा केली असता उपआयुक्त थोरात तोंडी सांगतात की “हा प्रभारी चार्ज आहे”. पण प्रत्यक्ष आदेशात “प्रभारी” हा शब्द एकदाही नाही. आदेशात स्पष्टपणे पूर्णवेळ वरिष्ठ पदभार म्हटलेले आहे. म्हणजे तोंडी काही, लिखित काही—सरकारी कागदांशी अशी थट्टा करूनही मनपा प्रशासनाचे चेहर्यावर लवलेशही लाज न दिसणे हे आणखी धक्कादायक आहे.
या आदेशात आणखी एक संशय निर्माण करणारी बाब म्हणजे कामकाज एका क्षेत्राचे, पण वेतन मात्र दुसऱ्या खात्याने द्यावे असा उल्लेख. वरिष्ठतेला बगल, पात्रांना डावलणे, वेतनात विचित्र उलटापालट आणि बदलीतली वेगळीच कसरत—संपूर्ण आदेश एका व्यक्तीसाठी खास ‘सुव्यवस्थित’ केल्याचे संकेत उघडपणे ओरडत आहेत.
या प्रकारावर मनपा कर्मचाऱ्यांमध्ये संताप असून युनियननेही भूमिका स्पष्ट केली आहे. युनियनचे अध्यक्ष उदय भट यांनी हा आदेश वरिष्ठतेचा सरळ भंग असल्याचे सांगून आयुक्तांकडे तक्रार दाखल करण्याची खबर दिली आहे. “१३५ अधिकारी सक्षम नाहीत का, की त्यांच्याकडे पाठबळ नाही म्हणून ते बाजूला सारले?”—हा कर्मचाऱ्यांमधून मोठ्या प्रमाणात उमटणारा रोखठोक सवाल आहे.
नियम, प्रक्रिया, पारदर्शकता आणि वरिष्ठता यांच्यावर पाय ठेवून एखादा १३६वा अधिकारी ‘वरिष्ठ’ बनत असेल, तर हा प्रकार चूक, अनियमित आणि मनपा यंत्रणेवरचा अविश्वास वाढवणारा ठरतो, हे स्पष्ट आहे. पुणेकरांना स्वच्छतेची भाषा शिकवणाऱ्या विभागातच व्यवस्थेचीच घाण पसरलेली असेल, तर मनपाच्या नैतिकतेवर आणखी प्रश्न उपस्थित होणार यात शंका नाही.
