शिरपूर-धुळे (प्रतिनिधी तुषार शेटे) : मध्यप्रदेश सीमेलगत असलेल्या हाडाखेड परिसरात राज्य उत्पादन शुल्क विभागाने धडक कारवाई करत अवैध स्पिरीटची वाहतूक करणारी बोलेरो पिकअप जप्त केली आहे. या कारवाईत सात प्लास्टिक ड्रममध्ये भरलेले शुद्ध मद्यार्क (स्पिरीट) आणि वाहनासह एकूण ७ लाख २४ हजार ६०० रुपयांचा मुद्देमाल हस्तगत करण्यात आला आहे.
राज्य उत्पादन शुल्क आयुक्त डॉ. राजेश देशमुख, सह-आयुक्त प्रसाद सुर्वे, विभागीय उपायुक्त श्रीमती यु.आर. वर्मा आणि धुळे अधीक्षक स्वाती काकडे यांच्या आदेशानुसार, हाडाखेड सीमा तपासणी नाक्याचे पथक गस्तीवर होते. दुय्यम निरीक्षक एम.डी. पाटील यांना गुप्त बातमीदाराकडून एका महिंद्रा बोलेरो पिकअप (एमएच ०१ सीआर ४४६९) मधून पळासनेरकडून शिरपूरच्या दिशेने अवैध स्पिरीटची वाहतूक होणार आहे अशी माहिती मिळाली.
या माहितीनुसार, पथकाने सांगवी शिवारातील एच.पी.पेट्रोल पंपाजवळ मुंबई आग्रा महामार्गावर सापळा रचला. संशयित वाहन थांबवून झडती घेतली असता, त्यात ३५ लिटर क्षमतेचे ७ निळे प्लास्टिक ड्रम आढळून आले. यात एकूण २४५ लिटर शुद्ध मद्यार्क (स्पिरीट) भरलेले होते.
या कारवाईत स्पिरीट आणि वाहन जप्त करण्यात आले असले तरी, कारवाईची चाहूल लागताच चालक आणि मालक घटनास्थळावरून फरार झाले. याप्रकरणी महाराष्ट्र दारूबंदी अधिनियमाच्या विविध कलमान्वये (६५ अ, ई, ८०, ८१, ८३, ९०, ९८ (२) व १०८) गुन्हा नोंदवण्यात आला आहे.सदरची कारवाई दुय्यम निरीक्षक एम.डी. पाटील, एस.एस. निकम, जवान गोरख पाटील आणि प्रशांत बोरसे यांच्या पथकाने केली. या प्रकरणाचा पुढील तपास अधीक्षक स्वाती काकडे यांच्या मार्गदर्शनाखाली एम.डी.पाटील करीत आहेत.
