Times of Maharashtra Desk, Pune: पुण्यातील जैन बोर्डिंग हाऊसिंगच्या जमीन खरेदीवरून सुरू झालेला वाद शांत झाल्यानंतर आता पुन्हा एकदा शिवसेनेच्या रवींद्र धंगेकर यांनी भाजपा नेते मुरलीधर मोहोळ यांच्यावर गंभीर आरोप केले आहेत. मोहोळ यांच्या गुंडांनी हिंदुत्ववादी कार्यकर्त्यांवर हल्ला केल्याचा दावा धंगेकर यांनी केला आहे. मागील काही दिवसांपूर्वी जैन बोर्डिंग हाऊसिंगच्या जमीन खरेदी प्रकरणावरून महायुतीतील वाद चव्हाट्यावर आला होता. त्यावेळी उपमुख्यमंत्री एकनाथ शिंदे यांनी रवींद्र धंगेकर यांना महायुतीमध्ये वाद नको, अशा सूचना दिल्या होत्या. पुढे जैन बोर्डिंग हाऊसिंगचा व्यवहार रद्द झाल्यानंतर रवींद्र धंगेकर यांनी मुरलीधर मोहोळ यांच्यावर आरोप करणे थांबवले होते. आमचं आता ठरलं आहे, मी नाव घेणार नाही, असे म्हणत त्यांनी मुरलीधर मोहोळ यांच्यावर टीका करणे बंद केले होते. मात्र, काल धंगेकर हे मुंबई मधून पुण्यात आल्यानंतर त्यांनी पुन्हा एकदा मुरलीधर मोहोळ यांच्यावर गंभीर आरोप केले आहेत.
नेमके आरोप काय आहेत?
मुरलीधर मोहोळ यांनी भाजपाच्या अल्पसंख्यांक मोर्चाच्या चिटणीसपदी नेमणुक केलेल्या रफिक शेख नावाच्या गुंडाने पिस्तूल दाखवत त्याच्या 30 ते 40 साथीदारांसह पुण्यातील मेगा सिटी वस्तीमध्ये घुसून समीर चव्हाण, सनी चव्हाण यांसह वस्तीतील महिलांवर हल्ला केला आहे. रफिक शेख हा मुरलीधर मोहोळ यांचा गुंड आहे. असे आरोप शिवसेनेचे शहरप्रमुख रवींद्र धंगेकर यांनी केले आहेत. सुसंस्कृतपणा हा फक्त पत्रकारांसोबत बोलताना दाखवला जातो, गुन्हेगारीची पाळेमुळे इथेच आहेत, असेही ते म्हणाले.
मागील काही दिवसांपूर्वी जैन बोर्डिंग जमीन व्यवहार प्रकरणी महायुतीमध्ये आरोपांचा चांगलाच कलगितुरा रंगला होता. परंतु आता धंगेकरांच्या नवीन आरोपांमुळे महायुटीमध्ये पुन्हा एकदा खळबळ उडाली आहे.
