Times of Maharashtra Desk : जम्मू-काश्मीर पोलिसांनी अलीकडेच एक मोठे आंतरराज्यीय दहशतवादी जाळे उध्वस्त केले असून, हे जाळे जैश-ए-मोहम्मद आणि अन्सार गझवत-उल-हिंद या संघटनांशी संबंधित असल्याचे उघड झाले आहे. या तपासादरम्यान हरियाणातील फरीदाबाद येथे सुमारे ३५० किलो स्फोटक सामग्री, रायफल, पिस्तुले, ऐंशीहून अधिक जीवंत काडतुसे, टाइमर्स, बॅटऱ्या आणि वॉकी-टॉकी संच अशा शस्त्र सामग्रीचा मोठा साठा पोलिसांनी जप्त केला आहे. या साठ्यामध्ये एक असॉल्ट रायफल देखील हस्तगस्त करण्यात आली आहे. ही सामग्री एका घरातून आणि एका महिला डॉक्टरच्या कारमधून सापडल्याने प्रकरणाला वेगळे वळण मिळाले आहे.
या प्रकरणातील मुख्य संशयित डॉ. मुज्जमिल शकील, हा काश्मीरमधील पुलवामा जिल्ह्याचा रहिवासी असून, तो सध्या हरियाणातील एका विद्यापीठात सहाय्यक प्राध्यापक म्हणून कार्यरत आहे. तपासात असेही समोर आले की, आणखी एक डॉक्टर अदिल अहमद रदर, जो पूर्वी सहारनपूर येथे अटक झाला होता, त्याच्याद्वारे या संपूर्ण नेटवर्कचा माग काढण्यात पोलिसांना यश आले आहे. या महिला डॉक्टरच्या कारमधून रायफल सापडल्याने संशय वाढला असून, ती मुज्जमिल शकीलची सहकारी असल्याचे समजते. पोलिस या दोघांमधील संबंध आणि महिला डॉक्टरला या प्रकरणाची माहिती होती का, हे तपासत आहेत.
या घटनेमुळे राष्ट्रीय राजधानी परिसरात मोठ्या दहशतवादी कटाचा धोका निर्माण झाल्याचे संकेत मिळाले आहेत. इतक्या मोठ्या प्रमाणावर स्फोटक सामग्री दिल्लीच्या जवळ साठवली गेली होती, यावरून हा कट अत्यंत योजनाबद्ध आणि संघटित असल्याचे स्पष्ट होते. जैश-ए-मोहम्मद आणि अन्सार गझवत-उल-हिंद सारख्या संघटनांचे हात असल्याने, हा दहशतवादी मॉड्यूल भारतातील विविध राज्यांमध्ये सक्रिय असू शकतो, अशी भीती व्यक्त केली जात आहे.
सध्या पोलिस आणि गुप्तचर यंत्रणा या स्फोटकांचा मूळ स्रोत, वाहतूक मार्ग आणि यामागचा खरा उद्देश शोधत आहेत. शिक्षणक्षेत्राशी संबंधित व्यक्तींचा यात सहभाग असल्याने सुरक्षा यंत्रणांसाठी ही गंभीर चेतावणी मानली जात आहे. अशा प्रकारे सुशिक्षित व्यावसायिकांना वापरून या दहशतवादी संघटना आपली जाळी विणत असल्याचे या प्रकरणातून निदर्शनास येत आहे. आणि त्यामुळे देशातील अंतर्गत सुरक्षेच्या दृष्टीने सतर्कतेची गरज आणखी वाढली आहे.
