धीरज महांगरे ( पुणे शहर प्रतिनिधी) : पर्वती परिसरातील निलायम टॉकीजजवळील ओव्हरब्रिजखाली सुरू असलेल्या पावसाळी पूर्वतयारीच्या कामांचा बोजवारा उडाल्याचे गंभीर चित्र समोर आले आहे. महापालिकेकडून नाल्यांची साफसफाई, खोलीकरण आणि रुंदीकरणासाठी आणण्यात आलेले ‘स्पायडर मशीन’ अवघ्या दोन दिवसच काम करताना दिसले, त्यानंतर ते पूर्णपणे बंद अवस्थेत पडून आहे.
माहितीनुसार, तीन तारखेला नाल्यात उतरवण्यात आलेल्या या मशीनने सुरुवातीला केवळ वरवरची झाडे व झुडपे कापण्याचे काम केले. मात्र नाल्यातील गाळ काढणे, खोलीकरण आणि रुंदीकरण यांसारखी अत्यावश्यक कामे अद्यापही प्रलंबित आहेत. त्यामुळे पावसाळ्याच्या तोंडावरही परिसरातील नाले अपूर्ण स्थितीतच असल्याने नागरिकांमध्ये चिंता वाढली आहे.
सध्या हे मशीन गेल्या पंधरा दिवसांपासून बिघाडामुळे एकाच ठिकाणी निष्क्रिय पडून आहे. महापालिकेच्या निधीतून अशा यंत्रांचा दररोज खर्च होत असताना काम मात्र ठप्प असल्याने नागरिकांनी तीव्र नाराजी व्यक्त केली आहे. हे पावसाळी पूर्वतयारीचे काम आहे की निधी वाया घालवण्याचा प्रकार? असा सवाल स्थानिकांकडून उपस्थित केला जात आहे.
सामाजिक कार्यकर्ते दीपक वाघमारे यांनी या प्रकाराकडे प्रशासनाचे लक्ष वेधत तातडीने कारवाई करण्याची मागणी केली आहे. पावसाळा अगदी जवळ आला आहे. अशा निष्काळजीपणामुळे पाणी साचणे, पूरस्थिती निर्माण होणे यासारख्या समस्या उद्भवू शकतात, असे त्यांनी सांगितले.
स्थानिक नागरिकांनीही प्रशासनाला इशारा देत तातडीने मशीन दुरुस्त करून नाल्यांची कामे पूर्ण करण्याची मागणी केली आहे. अन्यथा आंदोलनाचा मार्ग अवलंबण्याचा इशाराही देण्यात आला आहे.
