नवनाथ आव्हाड ( नाशिक प्रतिनिधी ) : सिन्नर तालुक्यात बिबट्याची दहशत दिवसेंदिवस वाढत असून नांदूर शिंगोटे परिसरात भीतीचे वातावरण निर्माण झाले आहे. तालुक्यात बिबट्याचे दर्शन नवे नसले तरी अलीकडील घटनांमुळे नागरिकांमध्ये चिंता वाढली आहे.
शुक्रवारी सकाळच्या सुमारास नांदूर शिंगोटे येथील शेळके वस्तीवर बाळू नथू शेळके हे मेथीची भाजी काढण्यासाठी शेतात गेले असता त्यांना अचानक बिबट्याचे दर्शन झाले. घाबरलेल्या शेळके यांनी आरडाओरडा केल्याने परिसरातील शेतकरी तात्काळ घटनास्थळी जमा झाले. लोकांची चाहूल लागताच बिबट्याने प्रकाश शेळके यांच्या मक्याच्या शेतात धूम ठोकली.
या घटनेमुळे दिवसभर परिसरात भीतीचे वातावरण पसरले होते. संध्याकाळी सुमारे आठ वाजण्याच्या सुमारास बिबट्या पुन्हा दिसून आला. तो मक्याच्या शेताजवळील विहिरीवर पाणी पिण्यासाठी आल्याचे निदर्शनास आले. ही बाब लक्षात येताच बाळू शेळके यांनी परिसरातील शेतकऱ्यांना तात्काळ माहिती दिली. त्यानंतर ग्रामस्थांनी एकत्र येत रात्रभर जागून पहारा दिला.
शनिवारी सकाळी या घटनेची माहिती वन विभागाला देण्यात आली. परिस्थितीचे गांभीर्य लक्षात घेऊन वन विभागाच्या कर्मचाऱ्यांनी तातडीने घटनास्थळी भेट देत मक्याच्या शेतात पिंजरा लावला आहे. बिबट्याचा बंदोबस्त करण्यासाठी पुढील उपाययोजना करण्यात येत आहेत.
दरम्यान, परिसरातील शेतकरी व नागरिकांमध्ये अजूनही भीतीचे वातावरण असून लहान मुले व महिलांना बाहेर पडताना काळजी घेण्याचे आवाहन करण्यात येत आहे. वन विभागाने नागरिकांनी सतर्क राहावे व बिबट्याचे दर्शन झाल्यास तात्काळ माहिती द्यावी, असे आवाहन केले आहे.
