विष्णू गायकवाड ( गेवराई प्रतिनिधी ) : महाराष्ट्र योग शिक्षक संघ, गेवराई शहर समितीच्या वतीने संघाचा चतुर्थ वर्धापन दिन मोठ्या उत्साहात साजरा करण्यात आला. सकाळी ५.३० ते ७ या वेळेत आयोजित या कार्यक्रमाची सुरुवात महर्षी पतंजली यांच्या प्रतिमेला हार-फुले अर्पण करून व दीपप्रज्वलनाने झाली. त्यानंतर संघाच्या १२ सूत्री मागणीपत्राचे वाचन करण्यात आले.
कार्यक्रमात सहभागी झालेल्या योगसाधकांनी एकमेकांना नवीन वर्षाच्या शुभेच्छा देत सकारात्मक वातावरण निर्माण केले. यावेळी योग गीत सादर करण्यात आले तसेच सर्वांना प्रसादाचे वाटप करण्यात आले. गुढीपाडवा आणि संघाच्या स्थापना दिनानिमित्त विशेष कार्यक्रमाचे आयोजन करण्यात आले होते.
गुरुवार, दि. १९ मार्च रोजी आर. बी. अट्टल महाविद्यालयाच्या योगा हॉलमध्ये हा कार्यक्रम पार पडला. यामध्ये सूर्यनमस्कार, सूर्य अभिषेक, अग्निहोत्र, ओमकार जप, गायत्री मंत्र जप, महामृत्युंजय मंत्र जप आणि सूर्य दर्शन यांसारख्या विविध आध्यात्मिक व योगसाधना करण्यात आल्या. नव्या उगवत्या सूर्याचे फुलांच्या वर्षावाने स्वागत करण्यात आले. तसेच सहभागी सदस्यांनी एकमेकांना गळाभेट देत व चरणस्पर्श करून नववर्षाच्या शुभेच्छा दिल्या.
हिंदू नववर्षाची सुरुवात गुढीपाडव्यापासून होत असून याला शालिवाहन संवत्सर असेही म्हटले जाते. साडेतीन मुहूर्तांपैकी एक मानल्या जाणाऱ्या या दिवशी नवीन कार्यारंभ, खरेदी व व्यवसाय सुरू करणे शुभ मानले जाते. घराबाहेर उभारलेली गुढी ही विजय, समृद्धी आणि आनंदाचे प्रतीक असून ती नकारात्मक शक्तींना दूर ठेवते, अशी श्रद्धा आहे. वसंत ऋतूच्या प्रारंभामुळे निसर्गात नवचैतन्य निर्माण होत असल्याने हा सण विशेष महत्त्वाचा मानला जातो.
या प्रसंगी महाराष्ट्र योग शिक्षक संघाचे अध्यक्ष अरुण परदेशी, प्रा. राजेंद्र बरकसे, विलास मडकर, प्रकाश गिरी, बळीराम यादव, अॅड. सुभाष निकम, सुरेश मानधने, शिवप्रसाद भुतडा, मिलिंद कुलकर्णी, शंकर सूर्यवंशी, मनोहर सराटे, जयप्रकाश बाहेती, वैजिनाथ मोरे, विष्णू शेलार, रामकृष्ण चेडे, अमित शिखरे, प्रा. सतीश जाधव, प्रा. सुरेश पाटील, दीपक पुरी, नितीन कुलथे, सावता नाईक, राजेंद्र निकम, डॉ. भगवान जाधव, प्रा. रामलिंग गुळवे यांच्यासह अनेक योगसाधक मोठ्या संख्येने उपस्थित होते.
