जाबिर खान(सिरोंचा प्रतिनिधी) : सिरोंचा, दि. २१ मार्च २०२६ (प्रतिनिधी) – “जनसेवा हीच ईश्वर सेवा” या ब्रीदवाक्यानुसार माजी कॅबिनेट मंत्री तथा विद्यमान आमदार डॉ. धर्मरावबाबा आत्राम यांच्या पुढाकारातून सिरोंचा शहरासाठी दुसरी (लहान) अॅम्बुलन्स जनतेच्या सेवेसाठी समर्पित करण्यात आली आहे.
नगरसेवक सतीश भोगे यांच्या सातत्यपूर्ण पाठपुराव्यामुळे ही अॅम्बुलन्स मिळाली असून, त्यांच्या मागणीला अखेर यश मिळाले आहे. यापूर्वी सिरोंचात एक मोठी अॅम्बुलन्स कार्यरत होती, आता नव्याने आलेल्या या दुसऱ्या अॅम्बुलन्समुळे रुग्णवाहिका सेवेत मोठी भर पडणार आहे.
नवीन अॅम्बुलन्सचे महाकाली माता मंदिर येथे विधीवत पूजन करण्यात आले. पंडित मनोहर शर्मा यांच्या हस्ते पूजन सोहळा पार पडला. या अॅम्बुलन्समुळे सिरोंचा नगरपंचायत हद्दीतील गरीब व गरजू रुग्णांना वेळेत रुग्णालयात ने-आण करण्यास मोठी मदत होणार आहे.
या पूजन कार्यक्रमाला तालुका अध्यक्ष मधुकर कोल्लूरी, नगरसेवक सतीश भोगे, नगरसेवक जगदिश रालबंडीवार, पत्रकार नागभूषणम चकिनारपुवार, शहराध्यक्ष रवी सुलतान, कार्याध्यक्ष मदनाय्य मदेशी, अल्पसंख्याक अध्यक्ष जुगुनू भाई तसेच इतर कार्यकर्ते मोठ्या संख्येने उपस्थित होते.
