विकास चव्हाण ( पुणे प्रतिनिधी ) : महाराष्ट्र इमारत व इतर बांधकाम कामगार कल्याणकारी मंडळ (MAHABOCW) अंतर्गत बांधकाम कामगारांच्या मुलांना देण्यात येणारी शिष्यवृत्ती अनेक ठिकाणी अद्याप प्रलंबित असल्याची बाब समोर आली आहे. यामुळे कामगार व त्यांच्या कुटुंबियांमध्ये नाराजी व्यक्त होत आहे.
यासंदर्भात सरपंच मंगल शेंडकर यांनी शासनाकडे तातडीने लक्ष देण्याची मागणी केली आहे. त्यांनी सांगितले की, नोंदणीकृत बांधकाम कामगारांच्या मुलांना शिक्षणासाठी दरवर्षी ₹२,५०० ते ₹१,००,००० पर्यंत शिष्यवृत्ती दिली जाते. मात्र अनेक पात्र विद्यार्थ्यांना अद्याप ही रक्कम मिळालेली नाही.
या योजनेअंतर्गत इयत्ता १ ली ते ७ वीसाठी ₹२,५००, ८ वी ते १० वीसाठी ₹५,०००, तसेच १० वी व १२ वीमध्ये ५०% पेक्षा जास्त गुण मिळवणाऱ्या विद्यार्थ्यांना ₹१०,००० इतकी मदत दिली जाते. उच्च शिक्षणासाठीही ₹५,००० ते ₹१,००,००० पर्यंत आर्थिक सहाय्य उपलब्ध आहे.
शिष्यवृत्ती मिळण्यासाठी संबंधित कामगाराची नोंदणी आवश्यक असून विद्यार्थ्यांची किमान ७५% उपस्थिती असणे बंधनकारक आहे. अर्ज प्रक्रिया ऑनलाइन mahabocw.in या संकेतस्थळावरून किंवा जवळच्या कामगार कार्यालयामार्फत करता येते.
सरपंच मंगल शेंडकर यांनी प्रशासनाला इशारा देत सांगितले की, “पात्र विद्यार्थ्यांची शिष्यवृत्ती लवकरात लवकर वितरित न झाल्यास आंदोलन छेडले जाईल.” त्यांनी संबंधित विभागाने तातडीने प्रलंबित अर्ज निकाली काढावेत, अशी मागणी केली आहे.
