निफाड(प्रतिनिधी योगेश कर्डिले) : नाशिक जिल्ह्यातील निफाड येथे युवक काँग्रेसच्या वतीने ट्रॅक्टर मोर्चा काढत केंद्र सरकारच्या प्रस्तावित भारत-अमेरिका व्यापार कराराचा निषेध करण्यात आला. नाशिक जिल्हा युवक काँग्रेस आणि निफाड तालुका युवक काँग्रेसच्या संयुक्त विद्यमाने कृषी उत्पन्न बाजार समितीपासून तहसील कार्यालयापर्यंत हा मोर्चा निघाला.
या आंदोलनाचे नेतृत्व युवक काँग्रेसच्या प्रदेश उपाध्यक्ष सय्यद मॅडम, जिल्हाध्यक्ष गौरव पानगव्हाणे आणि तालुकाध्यक्ष सचिन खडताळे यांनी केले. आंदोलनकर्त्यांनी आरोप केला की, प्रस्तावित करारामुळे देशातील शेतकरी, ग्रामीण अर्थव्यवस्था आणि अन्नसुरक्षा धोक्यात येऊ शकते. शेतीमालाला योग्य हमीभाव मिळत नसतानाच हा करार शेतकऱ्यांच्या अडचणी वाढवणारा ठरेल, अशी भूमिका यावेळी मांडण्यात आली.
मोर्चात अनेक शेतकरी स्वतः ट्रॅक्टरसह सहभागी झाले होते. यावेळी महाराष्ट्र प्रदेश काँग्रेसचे उपाध्यक्ष राजाराम पानगव्हाणे, जिल्हा सरचिटणीस सचिन होळकर यांसह अनेक पदाधिकारी उपस्थित होते. शेवटी तहसीलदार विशाल नाईकवाडे यांना निवेदन देत हा करार तात्काळ रद्द करण्याची मागणी करण्यात आली.
या आंदोलनामुळे निफाड परिसरात राजकीय वातावरण तापले असून, शेतकरी प्रश्न पुन्हा ऐरणीवर आले आहेत.
