जळगाव (प्रतिनिधी विनोद पवार) : जळगाव शहरात वाढदिवस साजरा करण्याचा एक वेगळा आणि समाजाभिमुख आदर्श समोर आला आहे. चेतना व्यसनमुक्ती केंद्राचे प्रमुख नितीन विसपुते यांनी आपल्या वाढदिवसानिमित्त गरजू कामगारांसाठी सेवाभावी उपक्रम राबवून समाजासमोर प्रेरणादायी उदाहरण ठेवले.
३० एप्रिल रोजी भोईटे नगर परिसरातील माल धक्का येथे कष्टकरी कामगारांसाठी विशेष कार्यक्रम आयोजित करण्यात आला. उन्हाळ्याच्या तीव्रतेत काम करणाऱ्या कामगारांना दिलासा मिळावा या हेतूने स्टीलच्या पाण्याच्या बाटल्या, ORS पॅकेट्स आणि हातरुमालांचे वाटप करण्यात आले. या उपक्रमामुळे कामगारांना प्रत्यक्ष मदत मिळाल्याने समाधान व्यक्त करण्यात आले.
कार्यक्रमाच्या वितरण सोहळ्यास जळगावचे आमदार राजू भोळे, नगरसेविका रंजनाताई वानखेडे तसेच भाजपा कोशाध्यक्ष विजय वानखेडे उपस्थित होते. त्यांच्या हस्ते साहित्याचे वाटप करण्यात आले. यावेळी महाराष्ट्र सुवर्णकार सेना जळगाव जिल्ह्याचे पदाधिकारी, चेतना व्यसनमुक्ती केंद्राचे सदस्य आणि स्थानिक नागरिक मोठ्या संख्येने उपस्थित होते.
या उपक्रमातून “वाढदिवस म्हणजे समाजासाठी काहीतरी देण्याची संधी” हा संदेश प्रभावीपणे देण्यात आला असून, शहरात या उपक्रमाची चर्चा रंगली आहे.
