गेवराई (प्रतिनिधी विष्णू गायकवाड) :
बीड जिल्ह्यातील गेवराई तालुक्यात शिक्षण क्षेत्राला नवी दिशा देणारी महत्त्वाची घडामोड घडली असून, ज्येष्ठ शिक्षण विस्तार अधिकारी भीमाशंकर नांदुरकर यांची गट शिक्षणाधिकारीपदी नियुक्ती करण्यात आली आहे. बीड जिल्हा परिषदेने २५ एप्रिल रोजी यासंदर्भातील अधिकृत आदेश निर्गमित केले. त्यानंतर नांदुरकर यांनी मावळते गट शिक्षणाधिकारी प्रवीण काळम पाटील यांच्याकडून पदभार स्वीकारला.
मुळचे बीड येथील रहिवासी असलेले नांदुरकर यांना शिक्षण क्षेत्रातील प्रदीर्घ अनुभव असून त्यांनी वडवणी, अंबाजोगाई आणि परळी येथे गट शिक्षणाधिकारी म्हणून यशस्वीपणे काम पाहिले आहे. शांत, संयमी आणि मेहनती अधिकारी म्हणून त्यांची ओळख असून, त्यांच्या नियुक्तीमुळे गेवराई तालुक्यातील शिक्षक व शिक्षकेतर कर्मचाऱ्यांमध्ये आनंदाचे वातावरण निर्माण झाले आहे.
सध्या तालुक्यात ज्येष्ठ शिक्षण विस्तार अधिकारी आणि केंद्रप्रमुखांची संख्या अत्यल्प असताना शिक्षण व्यवस्थापनाची मोठी जबाबदारी नांदुरकर यांच्यावर येणार आहे. उपलब्ध मनुष्यबळाच्या मर्यादांमध्ये शिक्षण विभाग प्रभावीपणे चालवणे, शाळांमध्ये गुणवत्तापूर्ण शिक्षण देणे आणि शैक्षणिक उपक्रमांना चालना देणे हे त्यांच्यासमोरील मोठे आव्हान असणार आहे.
याशिवाय, काही शिक्षक व शिक्षकेतर कर्मचारी दीर्घकाळ गट शिक्षण कार्यालयात कार्यरत असून त्यांना त्यांच्या मूळ कार्यस्थळी परत पाठवण्याची अपेक्षाही व्यक्त होत आहे. प्रशासनातील शिस्त आणि कार्यक्षमतेसाठी हा निर्णय महत्त्वाचा ठरणार आहे.
गेवराई तालुक्याला अनुभवी आणि कर्तव्यदक्ष अधिकारी मिळाल्याने शिक्षण क्षेत्रात सकारात्मक बदल घडतील, अशी आशा व्यक्त होत आहे. अनेक शिक्षकांनी नांदुरकर यांना शुभेच्छा देत त्यांच्या कार्यकाळात तालुक्याच्या शिक्षण व्यवस्थेला नवे बळ मिळावे, अशी अपेक्षा व्यक्त केली आहे.
