जळगाव (प्रतिनिधी विनोद पवार) :
लेवा समाजातील क्रीडा चळवळीला नवे बळ देणाऱ्या लेवा स्पोर्ट्स क्लब फेडरेशनच्या भव्य उद्घाटन सोहळ्याने उत्साहाचा उच्चांक गाठला. अत्यंत जल्लोषात पार पडलेल्या या कार्यक्रमात फेडरेशनचा अधिकृत लोगोही अनावरण करण्यात आला. कार्यक्रमाला केंद्रीय क्रीडा व युवक व्यवहार राज्यमंत्री रक्षा खडसे यांची प्रमुख उपस्थिती लाभल्याने सोहळ्याला विशेष प्रतिष्ठा प्राप्त झाली.
फेडरेशनची स्थापना क्रीडा संस्कृतीचा प्रसार, युवकांमध्ये क्रीडाप्रेम जागृत करणे आणि ग्रामीण तसेच शहरी भागातील खेळाडूंना एक सक्षम व्यासपीठ उपलब्ध करून देणे या व्यापक उद्दिष्टांसाठी करण्यात आली आहे. या उपक्रमातून गुणवंत खेळाडूंना प्रशिक्षण, तांत्रिक मार्गदर्शन आणि विविध स्पर्धांमध्ये सहभागाची संधी देण्याचा संकल्प आयोजकांनी व्यक्त केला.
उद्घाटनप्रसंगी बोलताना मंत्री रक्षा खडसे यांनी फेडरेशनच्या कार्याचे कौतुक करत क्रीडा क्षेत्राचे महत्त्व अधोरेखित केले. “क्रीडा ही केवळ स्पर्धा नसून व्यक्तिमत्त्व विकास, शिस्त आणि नेतृत्वगुणांची जडणघडण करणारे प्रभावी माध्यम आहे,” असे त्या म्हणाल्या. तसेच अशा समाजाभिमुख आणि युवक-केंद्रित उपक्रमांना शासनाचे सकारात्मक सहकार्य राहील, असा विश्वासही त्यांनी व्यक्त केला.
कार्यक्रमाच्या यशस्वी आयोजनासाठी फेडरेशनच्या पदाधिकाऱ्यांनी आणि सदस्यांनी घेतलेल्या परिश्रमांचे सर्वत्र कौतुक झाले. यावेळी भूषण व्ही. चौधरी, किरण नेमाडे, गणेश नेहेते, लोकेश चौधरी, समीर चौधरी, विशाल खाचणे, प्रशांत पाटील, वैशाली पाटील, तुषार पाटील, दुशांत नारखेडे आणि आकाश पाटील यांच्यासह अनेक मान्यवर उपस्थित होते.
सोहळ्यात फेडरेशनची उद्दिष्टे, भावी योजना आणि क्रीडा विकासासाठी राबवण्यात येणाऱ्या उपक्रमांचा सविस्तर आढावा सादर करण्यात आला. उपस्थित क्रीडाप्रेमी नागरिकांनी या उपक्रमाचे उत्स्फूर्त स्वागत करत, फेडरेशनला भविष्यात मोठे यश मिळो अशा शुभेच्छा दिल्या.
कार्यक्रमाच्या शेवटी फेडरेशनतर्फे सर्व मान्यवर, उपस्थित नागरिक आणि सहकाऱ्यांचे आभार मानण्यात आले. या भक्कम सुरुवातीच्या जोरावर क्रीडा क्षेत्रात उल्लेखनीय कार्य करण्याचा निर्धार फेडरेशनने व्यक्त केला असून, आगामी काळात अनेक नाविन्यपूर्ण उपक्रम राबवण्याचे संकेतही देण्यात आले.
