जळगाव : प्रतिनिधी (विनोद पवार) : ऑल इंडिया ऑर्गनायझेशन ऑफ केमिस्ट्स अँड ड्रगिस्ट्स (AIOCD) यांच्या देशव्यापी आंदोलनाच्या पार्श्वभूमीवर बुधवार, दि. २० मे २०२६ रोजी औषध विक्रेत्यांनी बंदची हाक दिली आहे. जळगाव जिल्हा मेडिसीन डिलर्स असोसिएशनच्या वतीने शहरातील विविध मेडिकल दुकानदारांनी या बंदला सक्रिय पाठिंबा दर्शविला असून शहरातील अनेक मेडिकल दुकाने बंद ठेवण्यात येणार आहेत.
या आंदोलनामागील प्रमुख मागण्या म्हणजे ऑनलाइन औषध विक्री तात्काळ बंद करणे, कॉर्पोरेट कंपन्यांकडून दिल्या जाणाऱ्या अव्यवसायिक डिस्काउंटला आळा घालणे तसेच बनावट औषधांच्या वाढत्या धोक्यापासून देशाला वाचविणे या आहेत. संघटनेच्या म्हणण्यानुसार, ऑनलाइन औषध विक्रीमुळे स्थानिक मेडिकल व्यावसायिकांचे मोठे आर्थिक नुकसान होत असून ग्राहकांच्या आरोग्याशीही गंभीर खेळ केला जात आहे.
AIOCD ने केंद्र सरकारला GSR 817 दिनांक 28 ऑगस्ट 2018 मागे घेण्याची मागणी केली आहे. तसेच कोविड काळात लागू करण्यात आलेल्या GSR 220 दिनांक 26 मार्च 2020 संदर्भातील नियमांबाबतही पुनर्विचार करण्याची मागणी करण्यात आली आहे. “रुग्णांच्या आरोग्याशी कोणतीही तडजोड होऊ नये,” असा इशाराही संघटनेने दिला आहे.
जळगावातील “अवनी मेडिकल” यासह अनेक मेडिकल व्यावसायिकांनी दुकानांवर बंदच्या सूचना लावून या आंदोलनात सहभाग नोंदविला आहे. व्यापाऱ्यांमध्ये या निर्णयाबाबत एकजूट दिसून येत असून सरकारने तातडीने दखल घ्यावी, अशी मागणी करण्यात येत आहे.
या आंदोलनाचे नेतृत्व राष्ट्रीय स्तरावर अध्यक्ष जगन्नाथ शिंदे व सचिव राजीव सिंघल करत आहेत. महाराष्ट्र राज्य केमिस्ट्स अँड ड्रगिस्ट्स असोसिएशनचे अध्यक्ष जगन्नाथ शिंदे आणि सचिव अनिल नांवंदर यांनीही आंदोलनाला पाठिंबा दिला आहे. जळगाव जिल्हा मेडिसीन डिलर्स असोसिएशनचे अध्यक्ष सुनील भंगाळे व सचिव अनिल झावर यांच्या मार्गदर्शनाखाली जिल्ह्यातील आंदोलनाची तयारी करण्यात आली आहे.
औषध विक्रेत्यांच्या या बंदमुळे काही प्रमाणात ग्राहकांना गैरसोय होण्याची शक्यता असली तरी, “ही लढाई केवळ व्यापाऱ्यांसाठी नसून रुग्णांच्या सुरक्षिततेसाठी आहे,” असे आंदोलनकर्त्यांनी स्पष्ट केले आहे.
