प्रतिनिधी उत्तम जाधव,
लाचलुचपत प्रतिबंधक विभागाने भ्रष्टाचाराविरोधात मोठी कारवाई करत येवला येथील वनपरिक्षेत्र अधिकारी कार्यालयातील सहा लोकसेवक आणि दोन खाजगी व्यक्ती अशा एकूण आठ जणांना 11,500 रुपयांची लाच स्वीकारताना रंगेहात पकडले. या कारवाईमुळे वन विभागात मोठी खळबळ उडाली आहे.
तक्रारदार यांच्या दहेगाव-पाटोदा येथील गट क्रमांक 61 मधील 2 हेक्टर 39 आर क्षेत्रातील सागाची झाडे तोडून विक्री करण्यासाठी वन विभागाची परवानगी आवश्यक होती. यासाठी त्यांनी वनपरिक्षेत्र अधिकारी कार्यालय, येवला-अंगणगाव येथे अर्ज केला होता.
परवानगी मंजूर करून देण्यासाठी संबंधित आरोपींनी सुरुवातीला 19,000 रुपयांच्या लाचेची मागणी केली होती. तडजोडीनंतर 11,500 रुपये देण्याचे निश्चित झाले.
दिनांक 16 मे 2026 रोजी करण्यात आलेल्या पडताळणी दरम्यान आरोपीने लाचेची मागणी केल्याचे निष्पन्न झाले. त्यानंतर दिनांक 19 मे रोजी लाचलुचपत प्रतिबंधक विभागाने सापळा रचला. यावेळी आरोपींनी आपापसात लाचेच्या रकमेची वाटणी निश्चित करून ती स्वीकारताना ACB पथकाने त्यांना रंगेहात पकडले.
रामनाथ बोरकडे यांनी तक्रारदारास लाच देण्यासाठी प्रोत्साहन दिल्याचे निष्पन्न झाले आहे.
कारवाईचा तपशील
या कारवाईत 500 रुपयांच्या 23 नोटा असलेली एकूण 11,500 रुपयांची रक्कम जप्त करण्यात आली. आरोपींविरोधात येवला शहर पोलीस ठाण्यात भ्रष्टाचार प्रतिबंधक अधिनियम 1988 अंतर्गत कलम 7, 7अ आणि 12 नुसार गुन्हा दाखल करण्याची प्रक्रिया सुरू आहे.
नाशिक ACB च्या या धडाकेबाज कारवाईचे सर्व स्तरातून स्वागत होत आहे.
