दौंड (प्रतिनिधी मयूर साळवे संघराज गायकवाड): दि. १० जून : दौंड तालुक्यातील आलेगाव व खोरवडी परिसरात मध्यरात्री पाच ते सात अज्ञात दरोडेखोरांनी धुमाकूळ घालत अनेक घरांमध्ये घुसून नागरिकांना मारहाण व दमदाटी करत तब्बल ७ लाख १० हजार रुपयांचा ऐवज लुटून नेल्याची खळबळजनक घटना घडली आहे. या प्रकरणी दौंड पोलीस ठाण्यात गुन्हा दाखल करण्यात आला आहे.
पोलीसांनी दिलेल्या माहितीनुसार, दि. १० जून रोजी पहाटे १ ते ३.१० वाजण्याच्या दरम्यान आलेगाव व खोरवडी गावांच्या हद्दीतील विविध वाड्या-वस्त्यांवर अज्ञात दरोडेखोरांनी हल्ला चढवला. आरोपींकडे चाकू, कोयता, लोखंडी रॉड, लोखंडी पाईप, लाकडी काठ्या व दगड अशी घातक हत्यारे होती. त्यांनी घरांमध्ये घुसून नागरिकांना मारहाण केली, शिवीगाळ व धमकावून सोन्याचे दागिने, रोख रक्कम, मोबाईल फोन तसेच दुचाकी वाहने जबरदस्तीने चोरून नेली.
या दरोड्यात विविध घरांमधून सोन्याचे दागिने, रोख रक्कम, दोन मोबाईल फोन व दोन दुचाकी वाहने असा एकूण ७ लाख १० हजार रुपयांचा मुद्देमाल लंपास करण्यात आला आहे.
या प्रकरणी सहाय्यक पोलीस उपनिरीक्षक संतोष मल्हारी शिंदे यांनी फिर्याद दिली असून दौंड पोलीस स्टेशन येथे गुन्हा रजि. क्र. ३९०/२०२६ अन्वये भारतीय न्याय संहिता (BNS) कलम ३१०(२), ३११, ११८(१) तसेच शस्त्र अधिनियम कलम ४ व २५ अंतर्गत गुन्हा दाखल करण्यात आला आहे.
पोलीस उपनिरीक्षक बिद्री यांनी गुन्हा दाखल केला असून पोलीस उपनिरीक्षक रुपेश कदम पुढील तपास करीत आहेत. मध्यरात्री झालेल्या या सशस्त्र दरोड्यामुळे आलेगाव व खोरवडी परिसरातील नागरिकांमध्ये भीतीचे वातावरण निर्माण झाले आहे.
