ब्रह्मपुरी (प्रतिनिधी रुपेश देशमुख): ब्रह्मपुरी येथील नागेश्वर नगर भागातून चोरीला गेलेली दुचाकी अवघ्या काही दिवसांत शोधण्यात ब्रम्हपुरी पोलिसांना यश आले आहे. या प्रकरणी पोलिसांनी एका अल्पवयीन मुलगा ताब्यात घेतले असून, त्याच्याकडून ६० हजार रुपये किमतीची स्प्लेंडर मोटारसायकल जप्त केली आहे.
नागेश्वर नगर येथील रहिवासी आणि गाड्यांच्या शोरूमचे मालक जगदीश राजिराम सहारे (४३) यांची स्प्लेंडर एक्स टेक २.० (क्र. MH 34 CK 8452) ही दुचाकी २ जून रोजी अज्ञात चोराने पळवून नेली होती. सहारे यांच्या तक्रारीवरून ब्रम्हपुरी पोलिसांनी ३ जून रोजी गुन्हा रजि. क्र. ५०६/२०२६, कलम ३०३ (२) भारतीय न्याय संहितेन्वये (BNS) गुन्हा नोंदवून तपास सुरू केला.
पोलीस निरीक्षक प्रमोद बानबले यांच्या मार्गदर्शनाखाली पोलीस हवालदार मुकेश गजबे तपास करत असताना, गुन्हे शोध पथकाला गुप्त बातमीदाराकडून खात्रीशीर माहिती मिळाली. या माहितीच्या आधारे पोलिसांनी एका संशयित विधीसंघर्ष बालकाच्या घरावर छापा टाकला. त्याच्या घरात चोरीची मोटारसायकल मिळून आल्याने ती जप्त करण्यात आली. या प्रकरणाचा पुढील तपास पोलीस करत आहेत.
ही कारवाई जिल्हा पोलीस अधीक्षक आयुष नोपानी, अप्पर पोलीस अधीक्षक ईश्वर कातकडे, उपविभागीय पोलीस अधिकारी दिनकर ठोसरे यांच्या मार्गदर्शनाखाली गुन्हे शोध पथकाचे सहायक पोलीस निरीक्षक मनोज खडसे, पोलीस हवालदार मुकेश गजबे, पोलीस अंमलदार प्रवीण भिवगडे, निलेश तुमसरे, इर्शाद खान, स्वप्नील पळसपगार व वशिष्ट रंगारी यांनी केली.
