दूध भेसळीची एसआयटी चौकशी करा मुख्य सूत्रधाराला अटक न झाल्यास आंदोलनाचा इशारा

सिन्नर:(प्रतिनिधी नवनाथ आव्हाड) सिन्नर तालुक्यातील दूध भेसळ प्रकरणात सामाजिक कार्यकर्ते भाऊसाहेब बैरागी यांनी मुख्य सूत्रधाराला तातडीने अटक करून संपूर्ण प्रकरणाची विशेष तपास पथकामार्फत (SIT) चौकशी करण्याची मागणी केली आहे. दूध भेसळीमुळे मोठ्या आर्थिक व्यवहारांचा आरोप असून, यापूर्वी अन्न व औषध प्रशासनाने कारवाई करून सुमारे १७ लाख रुपयांची दूध पावडर जप्त केली होती.
बैरागी यांनी राजकीय पाठबळामुळे प्रकरण दाबले जात असल्याचा आरोप केला आहे. दूध पावडरचा पुरवठा कुणाला केला जात होता, याची निष्पक्ष चौकशी करण्याची मागणी त्यांनी केली. तसेच प्रशासनाकडून प्रभावी कारवाई न झाल्यास आंदोलनाचा इशारा देण्यात आला आहे.
१५ ऑगस्टपर्यंत कठोर कारवाई न झाल्यास १५ ऑगस्ट रोजी नाशिक येथे अन्न व औषध प्रशासनाच्या उपायुक्त कार्यालयापासून मुंबईतील आयुक्त कार्यालयापर्यंत न्याय मागणी यात्रा काढण्याचा इशारा देण्यात आला आहे.