महापालिकेची कार्यपद्धती समजून घेण्यासाठी नगरसेवक प्रशिक्षणाला रवाना नाशिकमध्ये दोन दिवसीय विशेष प्रशिक्षण; तज्ज्ञांकडून मार्गदर्शन

जळगाव:(प्रतिनिधी विनोद पवार)  जळगाव शहर महानगरपालिकेच्या नवनिर्वाचित नगरसेवकांना महापालिकेच्या प्रशासकीय कामकाजाची, नियमांची व कार्यपद्धतीची सखोल माहिती मिळावी, तसेच महासभेत नागरिकांचे प्रश्न प्रभावीपणे मांडता यावेत, यासाठी अखिल भारतीय स्थानिक स्वराज्य संस्थेच्या वतीने नाशिक येथे दोन दिवसीय विशेष प्रशिक्षण शिबिराचे आयोजन करण्यात आले आहे.
शुक्रवार, दि. ७ व शनिवार, दि. ८ ऑगस्ट रोजी होणाऱ्या या प्रशिक्षणात महापालिकेचे प्रशासकीय कामकाज, विविध समित्यांची कार्यपद्धती, विकासकामांचे नियोजन, नियमावली आणि लोकप्रतिनिधींच्या जबाबदाऱ्यांबाबत तज्ज्ञांकडून मार्गदर्शन करण्यात येणार आहे.
जळगाव महापालिकेत यंदा मोठ्या संख्येने नवनिर्वाचित नगरसेवक निवडून आले आहेत. त्यामुळे त्यांना प्रशासकीय प्रक्रियेची माहिती मिळणे महत्त्वाचे मानले जात आहे. महापौर दीपमाला काळे यांनी या प्रशिक्षणासाठी विशेष पुढाकार घेतला आहे. आचारसंहितेमुळे यापूर्वी पुढे ढकलण्यात आलेले प्रशिक्षण आता नाशिक येथे आयोजित करण्यात आले आहे.
शुक्रवारी सकाळी ७ वाजता नगरसेवक महापालिकेच्या प्रांगणातून खासगी बसने नाशिककडे रवाना झाले.
“प्रशिक्षित नगरसेवक ही काळाची गरज असून, विकासकामे मार्गी लावण्यासाठी आणि लोकप्रश्न अभ्यासपूर्ण पद्धतीने मांडण्यासाठी हे प्रशिक्षण मैलाचा दगड ठरेल,” असे महापौर दीपमाला काळे यांनी सांगितले.
या प्रशिक्षणाचा शहराच्या विकासकामांवर सकारात्मक परिणाम होईल, अशी अपेक्षा व्यक्त होत आहे.