वनविभागाच्या आदेशाला केराची टोपली; वरिष्ठांचे धाबे दणाणणार, ‘अर्थ’पूर्ण व्यवहारांची जोरदार चर्चा?
पुणे (संपादक मुज्जम्मील शेख): पुण्याची हवा आणि येथील खुर्चीची ऊब एकदा लागली की अधिकाऱ्यांना इथून पाय काढावासा वाटत नाही, याचा प्रत्यय पुन्हा एकदा वनविभागात आला आहे. शासनाने पदोन्नती देऊन बदली केली, आदेश निघाले, पण मंगेश सपकाळे साहेब काही पुण्याची खुर्ची सोडायला तयार नाहीत. तब्बल चार महिने उलटले तरी बदलीच्या ठिकाणी हजर न राहणाऱ्या या अधिकाऱ्यासाठी सध्या कोणाची धावपळ सुरू आहे? आणि या महाशयांच्या डोक्यावर नेमका कोणत्या ‘आका’चा वरदहस्त आहे? असा संतप्त सवाल आता विचारला जात आहे.
शासकीय नियमांची उघड पायमल्ली:
२० एप्रिल २०२६ रोजी महाराष्ट्र शासनाच्या महसूल व वन विभागाने वनपाल ते वनक्षेत्रपाल या पदावर पदोन्नतीचे आदेश काढले. या आदेशातील यादीत क्रमांक २ वर असलेले मंगेश विठ्ठल सपकाळे यांची पुणे महसूल विभागातून ‘वनपरिक्षेत्र अधिकारी, सामाजिक वनीकरण, गगनबावडा, कोल्हापूर’ या रिक्त पदावर तदर्थ पदोन्नतीने बदली करण्यात आली आहे. शासन आदेशातील नियम क्र. ७ मध्ये अगदी स्पष्ट आणि ठळक शब्दांत नमूद केले आहे की, अधिकाऱ्यांनी आदेश निघाल्यापासून ३० दिवसांच्या आत नव्या जागी रुजू होणे बंधनकारक आहे. पण ‘पुणे तिथे काय उणे’ या उक्तीप्रमाणे, सपकाळे महाशयांनी या नियमाला थेट केराची टोपली दाखवली आहे. आज तब्बल चार महिने उलटून गेले तरी साहेब पुण्यालाच चिकटून आहेत.
वरिष्ठांचे संगनमत की सेटिंगची धावपळ?
शासन निर्णयातील मुद्दा क्र. ३ नुसार, मुख्य वनसंरक्षकांनी या अधिकाऱ्यांना पदोन्नतीच्या जागी रुजू होण्यासाठी ‘तात्काळ’ कार्यमुक्त करणे अपेक्षित होते. मात्र, वरिष्ठांनी या ‘तात्काळ’ शब्दाचा अर्थ बहुधा स्वतःच्या सोयीनुसार ‘कधीही नाही’ असा घेतला असावा. एका अधिकाऱ्याला चार महिने रिलीव्ह न करण्याचे धाडस वरिष्ठ अधिकारी कोणत्या दबावाखाली करत आहेत? सपकाळे यांना पुण्यालाच पुन्हा मलाईदार पोस्टिंग मिळावी यासाठी वरिष्ठ पातळीवर ‘सेटिंग’ करण्यासाठी कोणाची धावपळ सुरू आहे? या संपूर्ण साठमारीमागे असणारा तो ‘आका’ नेमका कोण आहे, ज्याच्या इशाऱ्यावर वनविभागाचे नियमही वाकवले जात आहेत?
वरिष्ठांचे धाबे दणाणणार:
सर्वसामान्यांना नियमांचा बडगा दाखवणारे वनविभागाचे वरिष्ठ अधिकारी स्वतःच्याच खात्यातील या लालफितशाहीवर मूग गिळून गप्प का आहेत? नियम मोडणाऱ्या अधिकाऱ्याला पाठीशी घालण्यामागे काही ‘अर्थ’पूर्ण तडजोडी झाल्या आहेत का, हा प्रश्न आता उघडपणे विचारला जात आहे. या प्रकरणातील वरिष्ठांचा बोटचेपेपणा आणि अधिकाऱ्याच्या पुण्याच्या प्रेमापोटी सुरू असलेली ही लपवाछपवी आता चव्हाट्यावर आली असून, या प्रकरणाची सखोल चौकशी झाल्यास अनेक बड्या अधिकाऱ्यांचे धाबे दणाणल्याशिवाय राहणार नाही.
शासनाने आता तरी झोपेतून जागे होऊन या ‘सेटिंग’बाज अधिकाऱ्याला तत्काळ गगनबावड्याचा रस्ता दाखवावा आणि त्याला पाठीशी घालणाऱ्या वरिष्ठांवरही कारवाईचा बडगा उगारावा, अशी तीव्र मागणी होत आहे. अन्यथा, “नियम फक्त कागदावर आणि कारभार मात्र ‘आका’च्या इशाऱ्यावर” हेच वनविभागाचे ब्रीदवाक्य मानावे लागेल.
