नाशिक, दि. ८ ऑगस्ट २०२६: नाशिक शहरासह जिल्ह्यात आज रात्री सुमारे १० वाजण्याच्या सुमारास भूकंपाचे धक्के जाणवले. उपलब्ध प्राथमिक माहितीनुसार भूकंपाची तीव्रता ४.३ रिश्टर स्केल इतकी असून केंद्र शिंदपाडा परिसरात असल्याचे वृत्त आहे.
नाशिक, दिंडोरी, वणी, ओझर तसेच जिल्ह्यातील विविध भागांत नागरिकांना काही सेकंद कंपने जाणवली. अचानक जाणवलेल्या धक्क्यांमुळे अनेक नागरिक घराबाहेर पडले असून काही ठिकाणी भीतीचे वातावरण निर्माण झाले आहे. नागरिकांनी सोशल मीडियावरील अफवांवर विश्वास न ठेवता अधिकृत प्रशासनाकडून मिळणाऱ्या माहितीकडे लक्ष द्यावे.
भूकंपाच्या पार्श्वभूमीवर नागरिकांनी घाबरून न जाता सुरक्षित ठिकाणी राहावे, इमारतीपासून दूर मोकळ्या जागेत जावे, लिफ्टचा वापर टाळावा आणि गॅस-विजेचे मुख्य स्विच सुरक्षितपणे बंद करावे, असे आवाहन करण्यात येत आहे.
प्राथमिक वृत्तानुसार सध्या मोठ्या जीवित किंवा वित्तहानीची माहिती समोर आलेली नाही. प्रशासनाकडून परिस्थितीचा आढावा घेतला जात आहे.
“सतर्क राहा, सुरक्षित राहा; अफवांवर विश्वास ठेवू नका.”
