शहरातील मुख्य बाजारपेठ, दौंड रेल्वे स्थानक परिसर आणि ग्रामीण भागातील अनेक रस्ते पाण्याखाली गेले आहेत. यामुळे दैनंदिन व्यवहार ठप्प झाले असून, व्यापाऱ्यांचे मोठ्या प्रमाणात नुकसान झाले आहे. किराणा दुकाने, भाजीपाला मार्केट आणि इतर छोट्या-मोठ्या दुकानांमध्ये ग्राहकांची वर्दळ जवळपास थांबली आहे. पावसामुळे रस्त्यांवरील खड्ड्यांची समस्याही गंभीर बनली असून, नागरिकांना ये-जा करण्यास मोठी कसरत करावी लागत आहे.
ग्रामीण भागात शेतकऱ्यांचेही हाल झाले आहेत. पेरणीपूर्व तयारी आणि काही ठिकाणी सुरू असलेली पेरणी पावसामुळे खोळंबली आहे. शेतातील पाणी साचल्याने पिकांचे नुकसान होण्याची भीती व्यक्त केली जात आहे. तसेच, ग्रामीण भागातील कच्च्या रस्त्यांमुळे वाहतूक पूर्णपणे ठप्प झाली आहे, ज्यामुळे दूध, भाजीपाला यांसारख्या नाशवंत वस्तूंची वाहतूकही अडचणीची ठरली आहे.
स्थानिक प्रशासनाने पावसामुळे उद्भवलेल्या समस्यांवर तातडीने उपाययोजना करण्याचे आश्वासन दिले आहे. मात्र, नागरिकांनी पालिकेच्या ढिसाळ नियोजनावर नाराजी व्यक्त केली आहे. पावसाळ्यापूर्वी नाल्यांची स्वच्छता आणि रस्त्यांची दुरुस्ती न झाल्याने परिस्थिती आणखी बिकट झाली आहे. पुढील काही दिवस पाऊस कायम राहण्याचा अंदाज हवामान खात्याने वर्तवला असून, नागरिकांना सतर्क राहण्याचे आवाहन करण्यात आले आहे.
