अकोला (प्रतिनिधी ज्ञानेश्वर जाधव) : भाजपला अकोल्यात मोठा धक्का RSS स्वयंसेवक डॉ. अशोक ओळंबे यांचा शिंदे गटात प्रवेश. सविस्तर वृत्त अकोला : अकोला जिल्ह्यात भारतीय जनता पार्टीला मोठा राजकीय धक्का बसला असून, राष्ट्रीय स्वयंसेवक संघाचे स्वयंसेवक व भाजपचे दीर्घकाळ कार्यरत असलेले डॉ. अशोक कोळंबे यांनी अखेर पक्षाला रामराम ठोकत शिवसेनेच्या शिंदे गटात प्रवेश केला आहे. मुंबई येथे महाराष्ट्र राज्याचे उपमुख्यमंत्री एकनाथ शिंदे यांच्या उपस्थितीत त्यांनी हा प्रवेश केला. डॉ. अशोक ओळंबे हे गेल्या सुमारे ३० वर्षांपासून भाजप व संघ परिवाराशी निष्ठेने जोडलेले होते.
त्यांनी पक्षासाठी विविध स्तरांवर काम केले असून, स्थानिक राजकारणात त्यांचा प्रभावही लक्षणीय मानला जातो. मात्र, मागील विधानसभा निवडणुकीत भाजपकडून तिकीट नाकारण्यात आल्याने त्यांनी अपक्ष उमेदवारी अर्ज दाखल करत निवडणूक लढवली होती. यानंतर त्यांनी पुन्हा पक्षात सक्रिय होण्याची इच्छा व्यक्त करत भाजपचे प्रदेशाध्यक्ष Ravindra Chavan यांच्याशी फोन व ईमेलद्वारे संपर्क केला. मात्र, त्यांच्या प्रयत्नांना कोणताही प्रतिसाद मिळाला नाही.
त्यामुळे नाराज झालेल्या डॉ. ओळंबे यांनी अखेर शिवसेनेच्या शिंदे गटात प्रवेश करण्याचा निर्णय घेतला. या प्रवेशामुळे अकोला जिल्ह्यातील भाजप संघटनेला मोठा धक्का बसल्याची चर्चा राजकीय वर्तुळात रंगली आहे. डॉ. अशोक ओळंबे यांच्या प्रवेशामुळे शिंदे गटाला जिल्ह्यात बळकटी मिळणार असल्याचेही मानले जात आहे. राजकीय विश्लेषकांच्या मते, स्थानिक पातळीवर निष्ठावंत कार्यकर्त्यांची नाराजी आणि त्याकडे दुर्लक्ष केल्यास आगामी काळात भाजपसमोर अधिक अडचणी निर्माण होऊ शकतात.
डॉ. अशोक ओळंबे यांच्या या निर्णयामुळे जिल्ह्यातील राजकीय समीकरणांमध्ये बदल होण्याची शक्यता व्यक्त केली जात आहे. दरम्यान, या घडामोडीमुळे अकोला जिल्ह्यातील राजकारण चांगलेच तापले असून, येणाऱ्या निवडणुकांमध्ये याचा काय परिणाम होतो याकडे सर्वांचे लक्ष लागले आहे.
