दौंड (प्रतिनिधी संघराज गायकवाड, मयुर साळवे) दौंड तालुक्यातील बिरोबानगर, गिरीम येथे २५ जून २०२५ रोजी दुपारी ३ वाजण्यापूर्वी मेंढीपाळ मोहन धुळा तालवर (वय ४५) यांचा अज्ञात व्यक्तीने कु-हाडीने डोक्यात आणि गळ्यावर गंभीर जखमा करून खून केल्याची धक्कादायक घटना घडली आहे. याप्रकरणी दौंड पोलिस ठाण्यात अज्ञात व्यक्तीविरुद्ध भा.द.वि. संहिता १०३ अंतर्गत खुनाचा गुन्हा दाखल करण्यात आला आहे.
फिर्यादी सावळाराम धुळा तालवर (वय ३२, रा. बिरोबानगर, गिरीम) यांनी दिलेल्या तक्रारीनुसार, २५ जून रोजी सकाळी ८ वाजता ते शेतात उसाचे पाचट पेटवण्यासाठी गेले होते. पाचट पेटवून घरी परतल्यानंतर त्यांनी म्हशीचे दूध काढून जाधव वाडी येथील योगेश जाधव यांच्या दूध डेअरीत दूध दिले. त्यानंतर दुपारी १:३० वाजण्याच्या सुमारास त्यांचे बंधू नातु धुळा तालवर यांनी फोनवर कळविले की, मोहन हा मेंढ्यांमागे नसून कुठेतरी झोपला असावा आणि मेंढ्या २-३ किमी दूर गेल्या आहेत. यानंतर सावळाराम यांनी मोटरसायकलवरून बेटवाडी येथील तंबूजवळ मोहनचा शोध घेतला, परंतु तो सापडला नाही.
सावळाराम यांनी वहिनी कमल मोहन तालवर यांना ही माहिती दिली आणि पुतण्या अजित याला फोन करून मोहनचा शोध घेण्यास सांगितले. सावळाराम आणि कमल दोघेही गिरीम गावच्या हद्दीतील फॉरेस्टच्या डोंगरावर शोध घेत असताना दुपारी ३ वाजण्याच्या सुमारास मोहन जखमी अवस्थेत पालथा पडलेला आढळला. त्याच्या डोक्याला आणि गळ्याला गंभीर जखमा झाल्या होत्या आणि तो बेशुद्ध होता. जवळच रक्ताने माखलेली लोखंडी पात्याची कु-हाड आणि दोन लाकडी काठ्या आढळल्या.
सावळाराम यांनी तातडीने पुतण्या अजित आणि बाजीराव तालवर यांना ही माहिती दिली. यावेळी नामदेव झिटे यांनी चारचाकी गाडी आणली आणि मोहनला उपचारासाठी दौंड येथील महालक्ष्मी हॉस्पिटलकडे नेण्यात आले. मात्र, त्याची हालचाल होत नसल्याने त्याला यवत येथील सरकारी रुग्णालयात नेले असता, डॉक्टरांनी त्याला मृत घोषित केले.
या प्रकरणाचा तपास पो.स.उ. बिद्री करत असून, पो.स.उ.कदम यांनी गुन्हा दाखल केला आहे. पोलिस अज्ञात आरोपीचा शोध घेत असून, परिसरात तणावाचे वातावरण आहे. या घटनेने गिरीम गावात खळबळ उडाली असून, स्थानिकांनी तातडीने आरोपीला पकडण्याची मागणी केली आहे.
