वन हक्क समिती अभावी फासेपारधी समाजाचे वनदावे रखडले. जिल्हाधिकाऱ्याकडे न्यायाची मागणी. बबनराव नागरे

(देऊळगाव राजा तालुका प्रतिनिधी): दिनांक 16 जून 2026 रोजी देऊळगाव राजा तालुक्यातील सेवा नगर अंडेरा येथील फासेपारधी समाजाच्या वनधारकांनी वन हक्क समिती स्थापन नसल्यामुळे त्यांचे वन हक्क दावे प्रलंबित असल्याचा आरोप करत जिल्हाधिकाऱ्याकडे निवेदन सादर केले आहे. वन हक्क कायद्यानुसार दावे दाखल करून घेण्याचे आदेश देण्यात यावेत किंवा स्वतंत्र ग्राम वन हक्क समिती स्थापन करण्यात यावी अशी मागणी यावेळी करण्यात आली आहे. पारधी विकास परिषदेचे उपजिल्हाध्यक्ष सुनील फारम पवार यांच्या नेतृत्वाखाली समाज बांधवांनी जिल्हाधिकारी कार्यालय बुलढाणा कार्यालयात निवेदन दिले. निवेदनात नमूद केल्यानुसार सेवा नगर अंधेरा येथील फासेपारधी समाजातील सुमारे 15 ते 20 कुटुंबे १९९४ पासून गट क्रमांक 98 मधील शासकीय वन जमिनीवर शेती करत असून त्याच शेतीच्या उत्पन्नावर त्यांचा उदरनिर्वाह सुरू आहे ग्रामपंचायत ने 20 जानेवारी 2015 रोजी ठराव मंजूर करून संबंधित फासेपारधी वंधारकांना वन जमीन त्यांच्या नावावर करण्यास कोणतीही हरकत नसल्याचे स्पष्ट केले होते. तसेच संबंधित कुटुंबाचा वन जमिनीवरील ताबा अनेक वर्षापासून असल्याचे विविध कागदपत्रे व पुरावावरून सिद्ध होत असल्याचा दावा करण्यात आला आहे .वन हक्क कायदा 2006 अंतर्गत अनुसूचित जमाती व पारंपारिक वन निवासी म्हणून त्यांना वैयक्तिक व सामूहिक वनहक्क मिळण्याचा अधिकार असतानाही ग्राम वन हक्क समितीच्या दुर्लक्षामुळे त्यांचे हक्क आजपर्यंत मान्य करण्यात आले नसल्याची खंत निवेदनात व्यक्त करण्यात आली आहे.