म्हसवड-माण (प्रतिनिधी महेश कांबळे) : तालुक्यातील धुळदेव गावातील एका सामान्य कुटुंबातील मुलीने आपल्या जिद्द, मेहनत आणि चिकाटीच्या जोरावर पोलीस दलात भरती होऊन इतिहास घडवला आहे. कु. सोनाली बापू पाटोळे असे या धाडसी युवतीचे नाव असून, तिच्या या यशामुळे संपूर्ण परिसरातून तिच्यावर अभिनंदनाचा वर्षाव होत आहे.
सोनालीचा प्रवास अत्यंत संघर्षमय राहिला. प्राथमिक शिक्षण गावात पूर्ण केल्यानंतर, आई-वडील कामानिमित्त बाहेर असल्याने तिने गोंदवले येथील गाडगे महाराज आश्रम शाळेत राहून शिक्षण घेतले. पुढे म्हसवडमधील सिद्धनाथ हायस्कूलमध्ये तिचे शिक्षण सुरू असताना, तिने पोलीस भरतीची तयारीही जिद्दीने चालू ठेवली.
तिचे वडील बापू पाटोळे हे गवंडी कामगार असून, आई ऊसतोड मजूर म्हणून काम करतात. अत्यंत हलाखीच्या परिस्थितीत चार मुलांचा सांभाळ करताना कुटुंबाला अनेक अडचणींचा सामना करावा लागला. यामध्ये एक मुलगा अपघातामुळे अपंग आहे, तर दुसरा शिक्षण घेत आहे.
अशा परिस्थितीतही सोनालीने हार न मानता शिक्षण आणि स्वप्न दोन्ही जपले. विशेष म्हणजे, ज्या समाजात मुलींचे शिक्षण अर्धवट सोडले जाते, तिथे तिने आपली वाट स्वतः घडवली.
निकालाच्या दिवशी आई-वडील मजुरी करत असतानाच तिच्या पोलीस भरतीची बातमी आली आणि त्यांच्या कष्टाचे चीज झाले. “आमच्या घरात पिढ्यानपिढ्या शिक्षण नव्हते, पण मुलीने तो दुष्काळ संपवला,” असे भावनिक उद्गार तिच्या वडिलांनी काढले.
रामोशी समाजातील सोनालीचे हे यश केवळ तिच्या कुटुंबासाठी नव्हे, तर संपूर्ण गावासाठी अभिमानाची बाब ठरली आहे. तिची ही कामगिरी इतर मुलींसाठी प्रेरणादायी ठरत आहे.
