वीज कोसळून तरुणाचा दुर्दैवी मृत्यू कठोरा बुद्रुक शिवारातील घटना; परिसरात हळहळ

जळगाव (प्रतिनिधी विनोद पवार): भुसावळ तालुक्यातील कठोरा बुद्रुक शिवारात शेतात पेरणीचे काम सुरू असताना अचानक झालेल्या विजेच्या कडकडाटात २१ वर्षीय तरुणाचा दुर्दैवी मृत्यू झाल्याची घटना सोमवारी (२९ जून) दुपारी सुमारे ३ वाजेच्या सुमारास घडली. या घटनेमुळे परिसरात शोककळा पसरली असून ग्रामस्थांमध्ये हळहळ व्यक्त होत आहे.
मिळालेल्या माहितीनुसार, खिलेश किशोर कोळी (वय २१) हा तरुण राजस्थान येथे रेल्वे प्रशिक्षण पूर्ण करून नुकताच गावी परतला होता. सोमवारी तो आपल्या वडिलांसह व मजुरांसोबत गट क्रमांक ६० मधील शेतात पेरणीचे काम करत होता. दुपारच्या सुमारास वातावरणात अचानक बदल होऊन विजांचा कडकडाट सुरू झाला. त्याचवेळी विजेचा जोरदार प्रहार झाल्याने खिलेश हा जागीच बेशुद्ध पडला.
घटनास्थळी उपस्थित असलेल्या वडिलांनी व मजुरांनी तातडीने त्याला वरणगाव ग्रामीण रुग्णालयात दाखल केले. मात्र वैद्यकीय अधिकाऱ्यांनी तपासणीनंतर त्याला मृत घोषित केले.
या दुर्दैवी घटनेमुळे कोळी कुटुंबावर दुःखाचा डोंगर कोसळला असून आई-वडील, भाऊ, बहीण व नातेवाईकांवर शोककळा पसरली आहे. गावकऱ्यांनीही खिलेश हा मेहनती, मनमिळावू व होतकरू युवक असल्याचे सांगत त्याच्या निधनाबद्दल तीव्र दुःख व्यक्त केले.
पावसाळ्यात शेतातील कामे करताना विजांच्या कडकडाटाच्या वेळी सुरक्षिततेची काळजी घेण्याचे आवाहन प्रशासनाकडून वारंवार करण्यात येत असते. अशा दुर्घटना टाळण्यासाठी हवामानाचा अंदाज लक्षात घेऊन शेतकऱ्यांनी व शेतमजुरांनी योग्य ती खबरदारी घेणे आवश्यक असल्याचे मत व्यक्त केले जात आहे.