गेवराई (प्रतिनिधी विष्णू गायकवाड) : जवाहर नवोदय विद्यालय, गढी, ता. गेवराई, जि. बीड येथे इयत्ता अकरावी विज्ञान शाखेच्या शैक्षणिक वर्ष २०२६-२७ साठी गुणवत्तेनुसार प्रवेश प्रक्रिया सुरू झाली असून पात्र विद्यार्थ्यांकडून अर्ज मागविण्यात येत आहेत.
प्रवेशासाठी आवश्यक पात्रता, नियम व अर्जाचा नमुना नवोदय विद्यालय समितीच्या अधिकृत संकेतस्थळावर उपलब्ध करून देण्यात आला आहे. तसेच इच्छुक विद्यार्थ्यांना जवाहर नवोदय विद्यालय, गढी येथे ऑफलाइन पद्धतीनेही अर्ज विनामूल्य उपलब्ध करून देण्यात येत आहेत.
विद्यालय प्रशासनाने दिलेल्या माहितीनुसार, इच्छुक विद्यार्थ्यांनी अर्ज योग्यरीत्या भरून आवश्यक कागदपत्रांसह दिनांक २५ जून २०२६ पर्यंत विद्यालयात सादर करावेत. अर्ज ई-मेलद्वारे किंवा प्रत्यक्ष विद्यालयात जमा करता येणार आहेत.
अर्ज सादर करण्यासाठी विद्यालयाचा ई-मेल पत्ता pmshrijnvbeed@gmail.com असा आहे. प्रवेश प्रक्रिया पूर्णपणे गुणवत्तेनुसार राबविण्यात येणार असून विद्यार्थ्यांना उत्कृष्ट शैक्षणिक सुविधा, निवासी व्यवस्था आणि गुणवत्तापूर्ण शिक्षणाची संधी उपलब्ध होणार आहे.
या सुवर्णसंधीचा जास्तीत जास्त विद्यार्थ्यांनी लाभ घ्यावा, असे आवाहन विद्यालयाचे प्राचार्य विजयकुमार भोस यांनी केले आहे. पालक व विद्यार्थ्यांनी वेळेत अर्ज सादर करून प्रवेश प्रक्रियेत सहभागी व्हावे, असेही त्यांनी नमूद केले.
